Իրանի արտաքին գործերի նախարար Աբբաս Արաղչին հայտարարել է, որ հակամարտությունից խուսափելու համար Միացյալ Նահանգների հետ գործարքը մոտ է իրականացմանը՝ Շվեյցարիայի Ժնև քաղաքում երկու երկրների միջև սպասվող բանակցություններից առաջ, հայտնում է ALJAZEERA-ն:
Արաղչին նշել է, որ աննախադեպ համաձայնագիր կնքելու պատմական հնարավորությունը կախված կլինի նրանից, թե արդյոք առաջնահերթությունը կտրվի դիվանագիտությանը՝ հավանաբար նկատի ունենալով ԱՄՆ նախագահ Դոնալդ Թրամփի շարունակական սպառնալիքները՝ Իրանի դեմ ռազմական ուժ կիրառելու վերաբերյալ։
Երեքշաբթի օրը սոցիալական ցանցերում տարածված հայտարարության մեջ Իրանի գլխավոր դիվանագետը հավելել է, որ իր երկրի դիրքորոշումը մնում է հստակ. այն ոչ մի պարագայում երբեք չի մշակի միջուկային զենք՝ միաժամանակ ճանաչելով Իրանի ժողովրդի իրավունքը՝ օգտվելու խաղաղ միջուկային տեխնոլոգիաների բարիքներից։
Հիշեցնենք, որ հինգշաբթի օրը Ժնևում կկայանա Վաշինգտոնի և Թեհրանի միջև անուղղակի բանակցությունների երրորդ փուլը, որոնք ընթանում են Օմանի միջնորդությամբ։ Օմանը հայտարարել է, որ հույս ունի տեսնել դրական մղում՝ գործարքի վերջնականացման ուղղությամբ լրացուցիչ ջանքեր գործադրելու համար։
