Հրապարակախոս Գագիկ Քամալյանը ֆեյսբուքյան իր էջում գրել է․
Նորմալ է, որ վարչապետի ու նրա կնոջ բաժանությունը դառնում է հանրային քննարկման պատճառ, որովհետև նրանք հանրային դեմքեր են, պետական ու քաղաքական պատասխանատվություն կրող մարդիկ են։
Ինձ, բնականաբար, չի հետաքրքրում, թե ինչու են բաժանվել, որովհետև դա իրենց անձնականն է, բայց ես քաղաքական առումով այս թեմային կանդրադառնամ, որովհետև բնական է, որ այս թեման քաղաքական շահարկումների առիթ է տալու և արդեն տվել է։
Ժողովուրդ ջան, ցանկացած մարդ, որը կազմել է ընտանիք, հնարավոր է՝ ինչ-որ պահի հայտնվի նման իրավիճակում, և վարչապետներն ու նախագահները բացառություն չեն։ Նրանք էլ են մարդիկ, որոնք ունեն զգացմունքներ, էգո, պատկերացումներ, և, բնականաբար, նման անձնական ճգնաժամեր իրենց հետ էլ կարող է լինել։
Փաշինյանի բաժանությունը ոչ առաջինն է, ոչ էլ, ցավոք սրտի, կլինի վերջինը։ Բաժանվել են Սարկոզին, Պուտինը, Օլանդը, եթե չեմ սխալվում՝ Ռեյգանը․ մի խոսքով՝ բազմաթիվ համաշխարհային ազդեցության գործիչներ, որովհետև, կրկնում եմ, նրանք էլ են մարդիկ, որոնք ունեն անձնական կյանք։
Խորհուրդս միայն այն է, որ ոչ ոք ձեզ չի ասում՝ մի քննարկեք, պարզապես եղեք ավելի հարգալից։
