«Ես ավելի քան 1,5 տարի առերևույթ ապօրինի կալանք էի, կալանավորված էի մեկ հոդվածով, որն ընդունման պահից գոյություն չուներ։ Այդ ժամանակահատվածի մեծ մասը եղել է նախաքննական փուլում»,- ՀՀ երկորրդ նախագահ Ռոբերտ Քոչարյանի ու նախկին այլ պաշտոնյաների գործով դատական նիստին ասաց Քոչարյանը։
Նա նշեց, որ դատական նիստերի ժամանակ դա ամբողջությամբ ներկայացնում էր քննչական խմբի ղեկավարը. «Հիմա ներկա դատախազը սրա հետ առնչություն ունի՞, թե՞՝ չունի։ Ես հիմա նստած պետք է նայեմ մի մարդու, լսեմ իր հայտարարությունները, որն ուղղակի մասնակից է եղել իմ ապօրինի կալանքին»։
Նա հիշեցրեց՝ քննվում էր այն հոդվածը, որը ճանաչվել է հակասահմանադրական։
«Փաստաբաները բոլոր նիստերի ժամանակ ասում էին, որ սա հակասում է սահմանադրությանը, քննչական խմբի ղեկավարն ու մասնակից դատախազները իրենց ճղում էին, որ չէ։
«Դատախազը մասնակից է եղել այդ քննաչական խմբին։ Հիմա իմ հարցը՝ ինքն այս ամենի հետ կապ ունի՞, թե՞ չունի։ Անկեղծ ասած ես չգիտեի, որ ինքն այդ քննչական խմբում էր։ Ինքը պետք է հիմա փորձի կոծկել, ամեն գնով իր ճիշտ լինելը պաշտպանել»,- ասաց Ռ.Քոչարյանը։
Հիշեցնենք, որ ՀՀ երկրորդ նախագահ Ռոբերտ Քոչարյանը, ԶՈւ գլխավոր շտաբի նախկին պետ, ՀԱՊԿ նախկին գլխավոր քարտուղար Յուրի Խաչատուրովը և ՀՀ պաշտպանության նախկին նախարար Սեյրան Օհանյանը մեղադրվում էին սահմանադրական կարգը տապալելու մեջ։ Մինչ ընդհանուր իրավասության դատարանը քննում էր գործը, ՍԴ-ն հակասահմանադրական ճանաչեց Քրեական օրենսգրքի այդ հոդվածը։
Վճռաբեկ դատարանը 2024-ի սեպտեմբերին բեկանել է Ռոբերտ Քոչարյանի, Յուրի Խաչատուրովի և մյուսների գործը կարճելու որոշումը և թույլատրել վերաորակավորել մեղադրանքը:
