Ամիսներ առաջ «Միասնության թևեր» նախաձեռնությունը և «Շանթ դաշինք» ազգայնական կուսակցությունը հայտարարեցին համագործակցության մասին։
Այսօր հայտնի դարձավ, որ «Միասնության թևեր» նախաձեռնության ղեկավար Արման Թաթոյանն ու «ՀայաՔվե» միավորման համակարգող Ավետիք Չալաբյանը ստորագրել են համագործակցության հուշագիր, և խորհրդարանական ընտրություններին կմասնակցեն միասին։
Radar Armenia-ի հետ զրույցում «Շանթ դաշինք» ազգայնական կուսակցության նախագահ Շահեն Հարությունյանը նշեց, որ դրական է գնահատում «ՀայաՔվե» հետ համագործակցությունը։
«Ինչպես հայտարարել ենք, նպատակ ունենալով միասնական մասնակցություն ունենալ հունիսի 7-ին կայանալիք ընտրություններում, մենք՝ «Շանթ դաշինք»-ի ներկայացուցիչները, ինչպես նաև՝ Արման Թաթոյանի ուժը, մշտապես պնդել ենք միավորման, ընդարձակման և ավելի ակտիվ պայքար տանելու անհրաժեշտությունը»,-նշեց նա։
Նրա խոսքով, այս ընթացքում իրենց համատեղ համագործակցությանը միացել են նոր ուժեր՝ տարբեր երիտասարդական միավորումներ, մասնագետներ և այլք. «Սա հերթական օրինակն է, թե ինչպես է հայկական շարժումը բնական կերպով ընդլայնվում և տեղավորվում մեր տրամաբանության մեջ»։
Շահեն Հարությունյանից հետաքրքրվեցինք՝ պատրա՞ստ են համագործակցել նաև այնպիսի ուժերի հետ, որոնք ռուսամետի համարում ունեն։շ
Նա նշեց՝ «Շանթ դաշինքը»-ը չի կարող համագործակցել այն ուժի հետ, որն ունի հստակ ռուսամետ դիրքորոշում.
«Անձամբ ես՝ որպես դաշինքի ներկայացուցիչ, որևէ ուժի հետ, որը նախընտրական գործընթացում ունի ռուսամետ դիրքորոշում, միավորումը համարում եմ բացառված»,- նշեց կուսակցության նախագահը։
