ԱՄՆ պետքարտուղար Մարկո Ռուբիոն հայտարարել է, որ նախագահ Դոնալդ Թրամփը չի բացառում Իրանի դեմ ցամաքային գործողության հնարավորությունը, սակայն ԱՄՆ-ն ներկայումս նման նպատակ չունի․ հաղորդում է FOX News-ը։
«ԱՄՆ-ն իրականացնում է գործողություն, որի նպատակն է չեզոքացնել Իրանի կարճ հեռահարության բալիստիկ հրթիռների և ռազմածովային ուժերի կողմից ներկայացվող սպառնալիքը։ Ահա թե ինչի վրա ենք մենք հիմա կենտրոնացած», – ասել է Ռուբիոն։
Նա ասել է, որ գործողությունն այժմ անհրաժեշտ է, քանի որ մեկ տարվա ընթացքում Իրանը կարող է կուտակել այնքան շատ հրթիռներ և անօդաչու թռչող սարքեր, որ դրա դեմ ռազմական արշավը գործնականում անհնար կլինի։ Ռուբիոն հավելել է, որ ԱՄՆ-Իսրայել գործողության հաջորդ փուլը Իրանի համար ավելի դժվար կլինի։
«Ես չեմ բացահայտի մեր մարտավարական ջանքերի մանրամասները։ Սակայն ամենալուրջ հարվածները դեռ չեն հասցվել։ Հաջորդ փուլը Իրանի համար ավելի ծանր կլինի, քան ներկայիս», – ընդգծել է նա։
Միևնույն ժամանակ, Ռուբիոն պարզաբանել է, որ ԱՄՆ-ն չի ձգտում Իրանում ռեժիմի փոփոխության։
«Մենք կողջունենք այս ռեժիմի փոփոխությունը։ Ինչպես նախագահ Թրամփն է ասել, նա կցանկանար, որ Իրանի ժողովուրդն օգտագործի այս հնարավորությունը՝ ապստամբելու և ներկայիս ղեկավարությանը տապալելու համար։ Սակայն գործողության նպատակն է ապահովել, որ Իրանը չունենա զենք, որը կարող է սպառնալ մեզ և մեր դաշնակիցներին տարածաշրջանում», – հավելել է նա։
