Արցախի Հանրապետության Անվտանգության խորհրդի նախկին քարտուղար Վիտալի Բալասանյանը օրերս վկայի կարգավիճակով հարցաքննվել է Երևան քաղաքի առաջին ատյանի ընդհանուր իրավասության Քրեական դատարանում: Բալասանյանը հարցաքննվել է Արցախի նախագահի աշխատակազմի անվտանգության վարչության պետի նախկին տեղակալ Նորայր Ասլանյանի գործի շրջանակում։
Նշենք, որ Նորայր Ասլանյանին մեղսագրվում է ռազմամթերք հանդիսացող «ԲՆ-3» տեսակի երկու հատ բեկորային նռնակ ապօրինի պահելն ու փոխադրելը։
Վերջինիս նկատմամբ հանրային քրեական հետապնդում է հարուցվել 2024թ. փետրվարի 22-ին ՀՀ քրեական օրենսգրքի 335-րդ հոդվածի 1-ին մասով և որպես խափանման միջոցներ են կիրառվել տնային կալանքը և բացակայելու արգելքը, ինչը հետագայում վերացվել է։
Գործով հաջորդ դատական նիստը նշանակվել է ապրիլի 28-ին ժամը՝ 10-ին Երևան քաղաքի առաջին ատյանի ընդհանուր իրավասության Քրեական դատարանի «Ավան» նստավայրում։
