«Ռոսատոմ»-ի գլխավոր տնօրեն Ալեքսեյ Լիխաչևը հայտարարել է, որ Իրանի ատոմակայանում աշխատանքները դադարեցվել են, և որ երկրի ողջ ատոմային արդյունաբերության ղեկավարության հետ կապը կորել է։
Նա նաև հայտնել է, որ «Ռոսատոմ»-ը ամեն ժամ կապ է պահպանում Բուշերի ատոմակայանի հետ, որտեղ դեռևս տեղակայված են 639 ռուս աշխատակիցներ։
«Իհարկե, Իրանում ատոմակայանում աշխատանքները դադարեցվել են։ Մենք շատ խիստ հսկողություն ենք իրականացնում մեր աշխատողների նկատմամբ, որպեսզի նրանք չլքեն իրենց բնակավայրերը և նվազագույն ներկայություն ունենան բաց շինհրապարակներում», – ասել է Լիխաչևը։
Պետական կորպորացիայի ղեկավարի խոսքով՝ Իրանի Բուշերի ԱԷԿ-ը «Ռոսատոմ»-ի համար առաջնահերթություն է։
«Մեր մարդիկ ամեն դեպքում կմնան այնտեղ: Այս վայրը մեր առաջնահերթությունների շարքում կլինի: Մենք հասկանում ենք մեր պատասխանատվությունը Իրանի ժողովրդի և կառավարության առջև», – ընդգծել է Լիխաչևը։
