Վարչապետ Նիկոլ Փաշինյանը կառավարության նիստում հայտարարել է՝ ինչպես Երևանի «էլիտար երեխաները», այնպես էլ գյուղի երեխան պետք է գնա ասֆալտապատ ճանապարհով թոփ մակարդակի դպրոց և ստանա կրթություն։
«Սա կարևոր արձանագրում է։ Երևանի աշակերտների մի զգալի մասը 6-30 կմ կտրում է և գնում դպրոց, ետ գալիս։ Ոչ ոք չի բողոքում դրանից։ Բայց ասում են, որ գյուղի երեխաներին պահենք ցեխերի մեջ։ Ո՛չ, չի լինելու այդպես», – նշել է վարչապետը։
ԿԳՄՍ նախարար Ժաննա Անդրեասյանը ևս անդրադառնալով թեմային՝ ընդգծել է, որ այժմ բարեփոխումներ են ընթանում.
«Օրինակ՝ ծնողների նախաձեռնությամբ Կապսում բացեցինք նորակառույց դպրոց։ Եթե գնանք, կտեսնենք, որ հարակից վայրերից էլ երեխաներ են գալիս, քանի որ ծնողները հաշվի են առնում նոր պայմանները», – ասել է նա։
Նա վստահեցրել է, որ կան գյուղեր, որ այժմ դատարկվել են, քանի որ մարդիկ տեղափոխվում են՝ իրենց երեխային ավելի լավ դպրոց ուղարկելու համար։
