Կառավարությունն այսօրվա նիստում ընդունեց որոշում երկարաձգելու Հայաստանի և Վերակառուցման և զարգացման եվրոպական բանկի միջև 2020 թվականի փետրվարի 7-ին ստորագրված «Մեղրիի սահմանային անցակետի ծրագիր» վարկային համաձայնագրի ժամկետը։
Ծրագրի շրջանակում ներգրավված ՎԶԵԲ-ի վարկային միջոցները՝ 10 մլն 626 հազար 263 եվրո, և Եվրոպական միության ներդրումային դրամաշնորհը՝ 10 մլն 520 հազար եվրո, նախատեսված են Մեղրի համայնքում միջազգային չափորոշիչներին համապատասխան նոր սահմանային անցակետի կառուցման համար։ ՀՀ կառավարությունը պարտավորվել է նաև համաֆինանսավորել ԱԱՀ-ի գծով ծախսերը՝ շուրջ 2.1 մլն եվրոյի չափով։
Ծրագրի իրականացման ժամկետները հետաձգվել են COVID-19 համավարակի և 2020 թվականի սեպտեմբերի 27-ին Ադրբեջանի կողմից սանձազերծված ռազմական գործողությունների հետևանքով։ Ծրագրի իրականացման ընթացքում առաջացած տեխնիկական և կազմակերպչական խնդիրների պատճառով կապալառուն ներկայացրել է նոր աշխատանքային գրաֆիկ, ըստ որի շինարարությունը նախատեսվում է ավարտել մինչև 2026 թվականի դեկտեմբերի վերջը։ Այդ պատճառով վարկային համաձայնագրի ժամկետը նախատեսվում է երկարաձգել մինչև 2027 թվականի հունվարի 31-ը։
