ՀՀ երրորդ նախագահ Սերժ Սարգսյանն անդրադարձել է վարչապետին անվստահություն հայտնելու նախաձեռնությանն ու այդ թեմայով քաղաքական ուժերի հետ երկխոսություն սկսելուն․
«Դեռ արձագանքներ չկան, բայց ես զարմանում եմ այն մարդկանց վրա, որոնք մշտապես փորձել, հիմա էլ են փորձում իմպիչմենտը հակադրել ընտրություններին»,- ասել է նա։
Ըստ Սերժ Սարգսյանի՝ անկախ որևէ հանգամանքից, իմպիչմենտ լինի, թե չլինի, ընտրություններ լինելու են․ «Դրանք հերթական ընտրություններ են, որ կարող են հետաձգվել միայն եզակի դեպքերում։ Մեր որոշումը միասնության մասին է․ մենք ասում ենք, որ իմպիչմենտը նաև ճգնաժամ հանգուցալուծելու գործիք է, եկեք՝ փորձենք։
Բայց երբ ասում են՝ չի լինի, հիմա ի՞նչ փորձենք, նմանվում են այսօրվա Հայաստանի կառավարիչներին, որ ասում են՝ թույլ ենք, Ադրբեջանն ինչ ուզում է, տանք։ Չեն ուզում՝ չեն ուզում, մենք մեր ուժերի սահմաններում կփորձենք իրականացնել»։
Ընտրություններին մանսակցելու մասին հարցին ի պատասխան էլ ասել է. «Ընտրություններին մասնակցել–չմասնակցելու առումով որոշում ենք կայացնելու` ելնելով նրանից, թե այն որքանով է արդյունավետ ՀՀ գործող կառավարիչների դեմ պայքարում»։
