Հայաստանի ԳԽ և ԼՂ ԱԺ նախկին պատգամավոր Վահրամ Աթանեսյանը գրել է․
Մեծագույն սուտ է, երբ ասում են, որ առաջին նախագահ Լեւոն Տեր-Պետրոսյանն առաջնորդվել է ,,պոլի փետ էլ լինի՝ միայն ՀՀՇ-ական լինի,, սկզբունքով: Իրականում գործել է ,,պոլի փետ էլ լինի՝ միայն հակաՀՀՇ-ական լինի,, համերաշխությունը, որ իռացիոնալի, դուրսպրծուկության եւ ,,պարկետի զինվորականության,, համախմբվածություն էր քաղաքակրթվածության, ինտելեկետի, դիվանագիտական հմտության եւ ռացիոնալ դատող զինվորականության դեմ: Միայն թե մի նոր շքանշան ստանային, միայն թե մի ,,օբյեկտ,, ստանային, միայն թե Տեր-Պետրոսյանը չվերադառնար: Հիմա ասում են, այդ թվում նաեւ՝ Տեր-Պետրոսյանի գաղափարակից համարվող շրջանակներից, որ սատանայի հետ էլ դաշինքի կգնան՝ միայն թե ,,Նիկոլին հեռացնեն,,:
Սատանայի հետ կարելի է համագործակցել, եթե նա, Տոլստոյի ասած՝ ,,անկյալ հրեշտակն է,,: Այսինքն՝ մեկ անգամ է սխալվել: Ի բնե, ի ծնե, ուղնուծուծով սատանան, որի մասին ղարաբաղցին ասում է ,,մոր ծիծ կտրող,, երբեք եւ ոչ մի իրավիճակում վստահելի չէ: Եթե, իհարկե, նրանք, որ ,,Նիկոլից ազատվելու,, գերխնդիր են դրել, չեն առաջնորդվում բացառապես քաղաքական չբավարարվածությունից վրեժխնդրության մոլուցքով: Բայց այդ դեպքում նրանք պետք է հաշվի առնեն, որ ,,սատանան,, Փաշինյանին ,,տապալելուց հետո,, հայտարարելու է, որ Հայաստանում վերջապես ,,լեւոնականությունն արմատախիլ արվեց,,:
Մի վայրկյան իսկ չկասկածեք, որ այդպես է լինելու: Եւ խնդիրն այստեղ Տեր-Պետրոսյանի կամ նրա շրջապատի ռենոմեն չէ, այլ՝ Հայաստանի ապագան: Ոչ մի իշխանություն ընդմիշտ չէ, բայց ՔՊ-ին փոխարինելու չպետք է վերադառնա նացիոնալ-ճորտությունը, սնամեջ պատրիոտիզմը եւ քվազիավանադապաշտությունը:
