ԱՄՆ նախագահ Դոնալդ Թրամփը The Times of Israel-ին տված հեռախոսազրույցում հայտարարել է, որ Իրանի հետ պատերազմի ավարտի ժամկետի վերաբերյալ որոշումը կընդունվի Իսրայելի վարչապետ Բինյամին Նեթանյահուի հետ համատեղ։
Թրամփի խոսքով՝ ԱՄՆ-ի և Նեթանյահուի գործողությունների բացակայության դեպքում Իրանը կարող էր ոչնչացնել Իսրայելը և տարածաշրջանի մյուս տարածքները։
«Իրանը պատրաստվում էր ոչնչացնել Իսրայելը և ամեն ինչ իր շուրջը… Մենք միասին աշխատել ենք։ Մենք ոչնչացրել ենք այն երկիրը, որը ցանկանում էր ոչնչացնել Իսրայելը», — ասել է նա։
Լրագրողի հարցին՝ արդյոք պատերազմի ավարտի վերաբերյալ որոշումը կընդունի միայն ինքը, թե այդ հարցում ձայն կունենա նաև Նեթանյահուն, Թրամփը պատասխանել է, որ քննարկումները կատարվում են երկկողմ ձևաչափով։
«Կարծում եմ՝ դա փոխադարձ գործընթաց է… որոշ չափով։ Մենք խոսում ենք։ Ես ճիշտ ժամանակին կկայացնեմ որոշումը, սակայն հաշվի կառնվեն բոլոր հանգամանքները», — նշել է նա՝ հավելելով, որ Նեթանյահուն նույնպես կներկայացնի իր դիրքորոշումը, սակայն վերջնական որոշումը կընդունի ԱՄՆ նախագահը։
Հարցին՝ արդյոք Իսրայելը կարող է շարունակել պատերազմը Իրանի դեմ նույնիսկ այն դեպքում, եթե ԱՄՆ-ը դադարեցնի հարվածները, Թրամփը հրաժարվել է քննարկել նման սցենարը՝ ասելով. «Կարծում եմ՝ դրա անհրաժեշտությունը չի լինի»։
Թրամփը նաև հրաժարվել է մեկնաբանել Իրանի գերագույն հոգևոր առաջնորդի պաշտոնում Մոջտաբա Խամենեիի հնարավոր ընտրությունը՝ նշելով. «Տեսնենք՝ ինչ կլինի»։
