ՀՀ վարչապետ Նիկոլ Փաշինյանն անդրադարձել է Հայաստանի ու Ադրբեջանի միջև բեռնափոխադրման արգելքների վերացմանը։ Նա հիշեցրել է, որ 2025թ. հոկտեմբերից բեռնափոխադրման կապը վերսկսվել է։
«Մենք էլ մեր հերթին հայտարարել ենք, որ այսօր պատրաստ ենք հենց այսօր ապահովել տարանցումը Ադրբեջանից դեպի Թուրքիա և հակառակ ուղղությամբ, որովհետև սա կարող ենք անել այս պահին մեր գործող ճանապարհներով։ Ոչ Ադրբեջանը, ոչ Թուրքիան այս հնարավորությունից դեռ չեն օգտվել, ենթադրում եմ նաև այն պատճառով, որ նման լուծումը գուցե բերի TRIPP նախագծի իրագործման ձգձգման։ Այս ամբիոնից պաշտոնապես հայտարարում եմ, որ ՀՀ-ն TRIPP նախագծի իրագործումը ոչ միայն ձգձգելու ոչ միայն մտադրություն, այլև պատճառ չունի, որովհետև նախագիծը լիարժեք համապատասխանում է ՀՀ կարճաժամկետ, միջնաժամկետ ու երկարաժամկետ շահերին»։
Վարչապետը նաև նշել է, որ Հայաստանը հենց այսօր պատրաստ է գործող ենթակառուցվածքներով Կոռնիձոր-Գորիս-Եղեգնաձոր-Երասխ երթուղիով ապահովել Ադրբեջանի արևմտյան շրջանների և Նախիջևանի միջև ավտոմոբիլային կապը։
Ըստ վարչապետի, ՀՀ-ն պատրաստվում է Վրաստան-Ադրբեջան երկաթուղին օգտագործել արտահանման համար. «Հույս ունեմ՝ առաջիկայում ՀՀ համար արտահանման հասցե կդառնա նաև Ադրբեջանը։ Իսկ ՀՀ-ն Ադրբեջանից ներկրում է նավթամթերք, ինչը մեր շուկայում նավթամթերքի գների նվազման առիթ դարձավ և կոտրեց այդ շուկայում տասնամյակներով հաստատված մենաշնորհները»։
