ՀՀ վարչապետ Նիկոլ Փաշինյանը Եվրոպական խորհրդարանում ելույթի ժամանակ անդրադարձավ խաղաղության գործընթացում հոգևորականների ներգրավվածությանը։ Նա հիշեցրել է Տավուշի թեմի առաջնորդ Բագրատ արքեպիսկոպոս Գալստանյանի գլխավորած շարժումը, որ սկսվել էր Տավուշում սահմանազատման գործընթացի մեկնարկի հետ միասին։ Նա ասել է, թե հոգևորականը ոչ միայն դրան էր դեմ, այլև՝ կողմ էր Ղարաբաղյան շարժման շարունակմանն ու Ադրբեջանի հետ կոնֆլիկտին։
«Հոգևորականների էմիսարները և նրանց հետ փոխկապակցված որոշ լոբիստական կազմակերպությունների ներկայացուցիչները Եվրոպական խորհրդարանում և միջազգային հեղինակավոր այլ կառույցներում փորձում են տարածել, թե Հայաստանի կառավարությունը սահմանափակում է խղճի ազատությունը, թե Հայաստանում բռնապետություն է հաստատվում, և կան քաղբանտարկյալներ»,- ասել է նա։
Վարչապետի խոսքով՝ իրականությունն այն է, որոշ հոգևորականներ, որոնք խախտել են հոգևոր բարեվարքության բոլոր կանոնները, այդպիսով իրենք իրենց խոցելի են դարձրել օտարերկրյա հատուկ ծառայությունների համար։
«Նրանցից ոմանց՝ Պետական անվտանգության կոմիտեի գործակալ լինելու փաստը ապացուցվում է փաստաթղթերով։ Այդ հոգևորականները ՀՀ-ում ստանձնել են պատերազմի կուսակցության առաջնորդությունը՝ իրենց շուրջ հավաքելով Հայաստանի նախկին ղեկավարներին և նրանց հետ կապված որոշ ուժերի»,- հավելել է Նիկոլ Փաշինյանը։
