Ռուսաստանի նախագահի մամուլի քարտուղար Դմիտրի Պեսկովը մի շարք հայտարարություններ է արել միջազգային քաղաքականության և էներգետիկ շուկաների վերաբերյալ։
Պեսկովի խոսքով՝ Կրեմլը Ռուսաստանի նկատմամբ նավթային պատժամիջոցների մեղմացմանն ուղղված ԱՄՆ-ի քայլերը դիտարկում է որպես գլոբալ էներգետիկ շուկաների կայունացման փորձ։ Նա նշել է, որ ներկայումս Ռուսաստանի և ԱՄՆ-ի շահերը համընկնում են համաշխարհային էներգետիկ շուկաների կայունացման հարցում, սակայն իրավիճակը շուկաներում շարունակում է մնալ լարված և կարող է հանգեցնել ճգնաժամի խորացման։
Խոսելով Ուկրաինայի շուրջ ստեղծված իրավիճակի մասին՝ Պեսկովը նշել է, որ Ռուսաստանը բարձր է գնահատում ԱՄՆ-ի ջանքերը՝ ուկրաինական ճգնաժամի կարգավորման ուղղությամբ։ Նրա խոսքով՝ Մոսկվան հույս ունի, որ կշարունակվեն նաև Ուկրաինայի հարցով եռակողմ բանակցությունները, թեև նոր բանակցային փուլի ժամանակն ու վայրը դեռևս չեն հստակեցվել։
Պեսկովը նաև նշել է, որ Ռուսաստանը չի անհանգստանում, թե Իրանում հնարավոր պատերազմի պատճառով ԱՄՆ-ի ուշադրությունը կարող է շեղվել ուկրաինական կարգավորման գործընթացից։
Եվրոպական երկրների մասին խոսելիս Պեսկովը նշել է, որ չի կարծում, թե Եվրոպայում ընդհանուր առմամբ փոխվել է վերաբերմունքը Կիևի իշխանությունների նկատմամբ։
