Նախագահ Դոնալդ Թրամփը NBC News-ին տված մոտ 30 րոպեանոց հեռախոսային հարցազրույցում հայտնել է, որ դեռ պատրաստ չէ համաձայնագիր կնքել Իրանի հետ պատերազմը ավարտելու համար, քանի որ «պայմանները դեռ բավական լավ չեն», թեև, ըստ նրա, երկիրը պատրաստակամություն է հայտնել։ Նա, սակայն, հրաժարվեց նշել, թե կոնկրետ ինչ պայմանների մասին է խոսքը։
Թրամփը նաև թերահավատություն է հայտնել, թե արդյոք Իրանի նոր գերագույն առաջնորդը «ընդհանրապես ողջ է»։ «Ես նույնիսկ չգիտեմ՝ նա ողջ է, թե ոչ», – ասել է Թրամփը հեռախոսազրույցի ընթացքում։ «Լսում եմ, որ նա կենդանի չէ, և եթե կենդանի է, ապա պետք է իր երկրի համար շատ խելացի բան անի՝ հանձնվի», – ավելացրել է Թրամփը, սակայն նշել է, որ նրա մահվան լուրը «պարզապես լուր է»։
Հարցին, թե ինչու է ժամանակավորապես թուլացրել ռուսական նավթի նկատմամբ որոշ պատժամիջոցներ՝ նավթի համաշխարհային գների կտրուկ աճի պայմաններում, նախագահը պատասխանեց. «Ես ուզում եմ, որ աշխարհում նավթ լինի։ Ես ուզում եմ նավթ»։ Նա ավելացրել է, որ այդ պատժամիջոցները, որոնք սահմանվել էին այն ժամանակ, երբ ՌԴ-ն ներխուժել է Ուկրաինա 2022 թվականին, «կվերականգնվեն, երբ ճգնաժամը ավարտվի»։
Թրամփը նաև քննադատել է Զելենսկուն. «Զարմացած եմ, որ Զելենսկին չի ցանկանում համաձայնության գալ։ Ասեք Զելենսկուն՝ համաձայնություն կնքի, որովհետև Պուտինը պատրաստ է»։ «Զելենսկու հետ պայմանավորվելը շատ ավելի դժվար է», – հավելել է ԱՄՆ նախագահը։
Թրամփը նաև նշել է, որ «մեզ օգնություն պետք չէ» և ավելացրել է, որ «վերջին մարդը, ումից օգնություն է պետք, Զելենսկին է»։ Զելենսկին այս ամսվա սկզբին առաջարկել էր օգնել ԱՄՆ ուժերին և նրանց դաշնակիցներին Մերձավոր Արևելքում՝ խոցելու իրանական անօդաչու թռչող սարքերը՝ օգտագործելով ռուսական դրոնները խոցելու հարցում ուկրաինական բանակի փորձը։
