ՀՀ ԿԳՄՍ նախարար Ժաննա Անդրեասյանը լրագրողների հետ զրույցում հայտնել է, որ գնահատում է Էդիտա Գզոյանին որպես գիտնական և գտնում է, որ նա կարող է շարունակել իր գիտական գործունեությունը, այդ թվում՝ Ցեղասպանության թանգարան-ինստիտուտում։
«Ես տիկին Գզոյանին շատ եմ գնահատում, մեր համագործակցությունը չի սպառվել, սակայն կառավարման ոլորտում առկա խնդիրները պետք է լուծվեն։ Մյուս կողմից եղել է իրավիճակ, որը չպետք էր տեղի ունենա, և այն ստացել է իր հանգուցալուծումը», -ասել է նախարարը։
Նախարարը նաև հերքել է այն տեղեկությունները, ըստ որոնց՝ Գզոյանը հեռացվել է շինարարական խնդիրների պատճառով. «Ես նման բան չեմ ասել։ Միշտ ավելի շատ ուշադրություն եմ դարձրել կառավարման հարցերին», -նշել է նա։
Նշենք, որ օրեր առաջ ՀՀ վարչապետ Նիկոլ Փաշինյանը հաստատել էր, որ Հայոց ցեղասպանության թանգարան-ինստիտուտի տնօրենը աշխատանքից ազատման դիմում է գրել: Վարչապետի խոսքով՝ Գզոյանը ԱՄՆ փոխնախագահ Ջեյ Դի Վենսին ուղեկցելիս նրան նվիրել է արցախյան հիմնահարցին վերաբերող գիրք, ինչը վարչապետի գնահատմամբ անհասկանալի և սադրիչ է եղել, քանի որ երկրի ղեկավարի մակարդակով հայտարարված է, որ Ղարաբաղյան շարժում գոյություն չունի։
