ԵՄ ընդլայնման հարցերով հանձնակատար Մարթա Կոս-ը այսօր՝ մարտի 19-ին, կլինի Հայաստանում. հայտնում են Եվրոպական հանձնաժողովից։ Հանձնակատարը Երևանում կհանդիպի ՀՀ վարչապետ Նիկոլ Փաշինյանին։ Քննարկումների օրակարգում են ԵՄ-Հայաստան առաջիկա գագաթնաժողովի նախապատրաստական աշխատանքները, ինչպես նաև տրանսպորտային, թվային, էներգետիկ և առևտրային կապերի ամրապնդումը՝ ԵՄ կապակցվածության օրակարգի շրջանակում։ Կողմերը կանդրադառնան նաև տարածաշրջանային իրավիճակին և Հայաստանի ժողովրդավարական դիմակայունությանը։
Մարթա Կոսը կհանդիպի նաև փոխվարչապետ Մհեր Գրիգորյանին՝ քննարկելու ԵՄ-ի 270 միլիոն եվրո արժողությամբ «Դիմակայունության և աճի ծրագրի» իրականացման ընթացքը։ Հանդիպումից հետո նախատեսվում է համատեղ մամուլի հայտարարություն։
Այցի շրջանակում հանձնակատարը կհանդիպի նաև ներքին գործերի նախարար Արփինե Սարգսյանին՝ երկկողմ համագործակցության հարցեր քննարկելու նպատակով։
Ուրբաթ օրը Մարթա Կոսը կայցելի Գյումրի, որտեղ կծանոթանա ԵՄ ֆինանսավորմամբ իրականացվող ծրագրերին՝ ուղղված սոցիալական ներառմանը, տեղական տնտեսական զարգացմանը և աշխատատեղերի ստեղծմանը։ Միայն 2024 թվականին ԵՄ ծրագրերի աջակցությամբ Հայաստանում աջակցություն է ստացել ավելի քան 7000 բիզնես, ստեղծվել է ավելի քան 20,000 աշխատատեղ։
Հանձնակատարը կայցելի նաև Գյումրիի պատմական շուկա, որը ներկայումս վերականգնվում է ԵՄ ֆինանսավորմամբ, ինչպես նաև նորարարական կենտրոն, որտեղ խթանվում են երիտասարդների հմտությունները տեխնոլոգիաների և դիզայնի ոլորտում։
Կոսը ելույթ կունենա Շիրակի պետական համալսարանում, կհանդիպի «Երիտասարդ եվրոպական դեսպաններ» նախաձեռնության ներկայացուցիչների, ինչպես նաև քաղաքացիական հասարակության և մեդիայի ներկայացուցիչների հետ, ովքեր ներգրավված են ԵՄ ծրագրերում։ Քննարկումները կկենտրոնանան նրանց գործունեության և Հայաստանի ժողովրդավարական դիմակայունության ամրապնդման գործում ունեցած դերի վրա։
