ՀՀ պաշտպանության նախարար Սուրեն Պապիկյանը հայտարարել է, որ «ՈՒժեղ Հայաստան» կուսակցության ղեկավար Սամվել Կարապետյանն իրավունք չունի խոսելու անվտանգությունից։
Նա շեշտել է. «Դժվար է, երբ ասում են՝ Սամվել Կարապետյանն ինչ-որ բան է հայտարարել, պետք է հասկանանք՝ արհեստական բանականության հետ գործ ունենք, թե իրական մարդու»։ Ըստ նրա, գործ ունեն վիրտուալ մարդկանց հետ։
Խոսելով Կարապետյանի մասին, Պապիկյանն ասել է. «Սամվել Կարապետյանը անվտանգությունից խոսելուց առաջ թող իրեն հարց տա և հասարակությանը պարզաբանի, որ մի ամբողջ գերդաստան ունի չծառայած զավակներով, որդիներով, թոռներով։ Մարդ, ով ունի մի գերդաստան, որոնց մի մասը չի ծառայել, պիտի պարզաբանում տա, նոր խոսի անվտանգությունից։ Թող պարզաբանեն՝ ինչու ՀՀ քաղաքացի լինելով չեն ծառայել։ Մարդիկ փախած են»։
Նա հարց է հնչեցրել՝ Սամվել Կարապետյանի տղաներն ո՞ւր են եղել մինչև 27 տարեկանը. «Փաստ է, որ այդ մարդիկ բանակից չեն ազատվել։ Նրանք մինչև 27 տարեկանը եղել են ՀՀ քաղաքացի, բայց չեն ծառայել»։
