«Քաղաքացիական պայմանագիր» խմբակցության պատգամավոր Խաչատուր Սուքիասյանը փորձեց ճշտել ԱԳ փոխնախարար Մնացական Սաֆարյանից, թե ռազմավարական գործընկերության պայմանագրեր կնքելուց հետո ինչ բոնուսներ է երկիրը ունենում և ինչ կարգի օպերատիվ կապի մեջ է լինում այդ երկրի տարբեր ինստիտուտների կամ պետական մարմինների հետ։
Նա նաև անդրադարձավ ներկայումս միջազգային հարթակներում ՀՀ-ի ընկալման փոփոխություններին՝ փորձելով հասկանալ, թե այս համատեքստում ինչպես են աշխատում դեսպանատները։
«Բացարձակ շատ լավ դիվանագիտական հարաբերություններ ստեղծվեցին այս վերջին տարիներին աշխարհի տարբեր երկրներում, այլ ձևով են ընկալում ՀՀ-ն, վերջին 30 տարում այն ձևով, որ այսօր ընկալվում է ՀՀ-ն, ոչ մի անգամ այդպես չի ընկալվել, այդքան բարեկամ ընկերներ չենք ունեցել, այդքան քաղաքական, դիվանագիտական պաշտոնյաներ չենք ունեցել,- շեշտեց պատգամավորը՝ հավելելով,- օրինակ՝ երբ արտակարգ իրավիճակ եղավ ԱՄԷ-ում, Կատարում, մյուս տեղերում, ֆանտաստիկ ձևով լավ աշխատեց մեր ԱԳՆ-ն, բայց երբ այդ արտակարգ իրավիճակը չկա, օրինակ՝ կամուրջ հանդիսացե՞լ են մեր դեսպանատները ՀՀ-Ուզբեկստան, ՀՀ-Տաջիկստան. դեսպանատունն ինչով է զբաղվում բացի դիվանագիտականից»,- ասաց նա։
Պատգամավորը նշեց, որ դեսպանատան վրա պետք է առաջադրանք դրվի, որ այսքան տնտեսական կապ ստեղծել, այսքան օգուտ տալ, որպեսզի ՀՀ-ի և այդ երկրների կամ դրանցից բացի այլ երկրների հետ փոխհարաբերություններ ստեղծվեն։
Սուքիասյանը շեշտեց, որ մեր բոլոր ինստիտուտները, բոլոր հարթակները, որոնք բյուջեից են սնվում, պետք է ՀՀ-ին տասնյակ անգամներ ավելի շատ եկամուտներ բերեն:
