ԱՄՆ նախագահ Դոնալդ Թրամփը գրառում է կատարել իր Truth Social հարթակում՝ անդրադառնալով Մերձավոր Արևելքում լարված իրավիճակին։
Իր հրապարակման մեջ Թրամփը կոշտ հայտարարությամբ դիմել է Իրանին՝ պահանջելով անհապաղ և առանց որևէ սպառնալիքի բացել Հորմուզի նեղուցը։ «Եթե Իրանը 48 ժամվա ընթացքում ամբողջությամբ և առանց սպառնալիքի չբացի Հորմուզի նեղուցը, ԱՄՆ-ն կհարվածի և կոչնչացնի նրանց էլեկտրակայանները՝ սկսելով ամենամեծից»,-գրել է ԱՄՆ նախագահը։
Ըստ Reuters-ի՝ Իրանի «Խաթամ ալ-Անբիա» ռազմական հրամանատարական շտաբը հայտարարություն է տարածել նշելով, որ եթե ԱՄՆ-ը հարվածի Իրանի վառելիքային և էներգետիկ ենթակառուցվածքներին, ապա Իրանը կթիրախավորի տարածաշրջանում ԱՄՆ-ի բոլոր էներգետիկ, տեղեկատվական տեխնոլոգիաների և ջրի աղազերծման ենթակառուցվածքները։
Մեկ այլ հրապարակմամբ Թրամփը նշել է, որ ԱՄՆ-ն չի ցանկանում Իրանի հետ գործարք կնքել. «Ամերիկայի Միացյալ Նահանգները բառացիորեն ջնջել է Իրանին քարտեզից։ Նրանց ղեկավարությունը վերացել է, նրանց նավատորմն ու օդուժը ոչնչացված են, նրանք բացարձակապես որևէ պաշտպանություն չունեն, և հիմա ուզում են գործարք կնքել։ Ես՝ ոչ», – նշել է Թրամփը։
