Արտաքին գործերի նախարար Արարատ Միրզոյանը անդրադարձել է Սահմանադրության փոփոխության դեմ հնչած տարբեր հայտարարություններին և ընդգծել է.
«ՀՀ-ն և՛ բանակցությունների ընթացքում, և՛ հանրային մի շարք առիթներով ասել է, որ Սահմանադրության մեջ Ադրբեջանի համար որևէ խնդրահարույց տարածքային հավակնությանը տանող պնդում չկա»,- նշել է ԱԳ նախարարը՝ հավելելով, որ վավերացրել են մի փաստաթուղթ, որը հղում է անում Ալմա-Աթայի արձանագրությանը, որը բացառում է տարածքային հավակնությունները միմյանց նկատմամբ։
Նրա խոսքով՝ Սահմանադրական դատարանը հանդես է եկել պաշտոնական եզրակացությամբ, որ Սահմանադրության մեջ որևէ խնդիր չկա։
«Ուզում եմ անդրադառնալ այն հայտարարությանը, թե «Ադրբեջանի նախագահը պահանջում է»։ Ուզում եմ վստահեցնել, որ Ադրբեջանի կողմից ՀՀ-ի նկատմամբ նման պահանջ չկա»,- ընդգծել է Արարատ Միրզոյանը՝ շեշտելով, որ Սահմանադրության փոփոխության հետ կապված հարցեր Ադրբեջանի հետ չեն բանակցվել։
