«Մեր վարչապետի թեկնածուն ոչ հներից է, ոչ նորերից է։ Ապագայի վարչապետ է։ Մեր երկրին այսօր պետք է ապագայի վարչապետ»,- դատարանի բակում լրագրողներին ասաց ԱԺ նախկին պատգամավոր, գործարար, բարերար, «Առաջարկ Հայաստանին» նախաձեռնության հիմնադիր Գագիկ Ծառուկյանը։
Նա ընդգծեց, որ կգա ժամանակը ու կտեղեկացնեն, թե ով է իրենց վարչապետի թեկածուն. «Հենց գա ժամանակը, կասենք։ Այսօր մեզ պետք է ապագային վարչապետ»։
Հարցին՝ ինչպե՞ս է վերաբերվում Նիկոլ Փաշինյանի հրապարակած տեսանյութերին «ուժեղ տղերքի» մասին, նա նշեց. «Մենք ուժեղ ենք մեր արած գործերով։ Կարող եք հանրության հարցնել։
Այսօր Հայաստանի առաջ շատ խնդիրներ են ծառացած ու պետք է դրա մասին մտածել»։
Ինչ վերաբերում է Նիկոլ Փաշինյանի մեկ այլ հայտարարությանը, որ եթե առաջիկա ընտրություններում ՔՊ սահմանադրական մեծամասնություն չկազմի, սեպտեմբերին աղետալի պատերազմ է լինելու, Գագիկ Ծառուկյանն ասաց. «Այսօր ոչ մեկը պատերազմ չի ուզում։ Պատերազմը, խաղաղությունը ոչ թե պետք է ձևական խոսքով լինի, Ադրբեջանի թելադրանքով՝ սա պետք է տաք, սա պետք է կատարեք, զորքերը քչանան, զենք չառնեք, իսկ իրենք ուժեղանան… Այստեղ խաղաղություն չկա։ Դա թելադրանք է։ Այսօր եթե հնարավորություն տրվի, որ մենք որոշողը լինենք, դրա բոլոր նախադրյալները կան, անմիջապես 3, 4, 5 հզոր, ազդեցիկ պետությունների հետ, որպես դաշնակից, փաստաթուղթ կստորագրենք և ճանճը չի տզզա այդ տարածքում։ Դա կլինի երաշխավորված խաղաղություն։ Խաղաղությունը պետք է լինի երաշխավորված։
Մենք, փոքր պետություն լինելով, հզոր դաշնակիցների կարիք ունենք։
Այսօր ի՞նչն է երաշխավորված։ Մեր բարձունքների վրա, մեր հողերում ադրբեջանցիներն են նստած, մեր գերիները, մեր գեներալները, նախագահներն այնտեղ, սա՞ է խաղաղություն»։
Հարցին՝ ասում են, ով ընտրություններին մասնակցելու հայտ է ներկայացնում, կալանավորում են, Գ.Ծառուկյանն ասաց. «Ինձ ձերբակալել են, ստուգել են։ Մարդը եթե ինքը մաքուր է, վստահ է, ինչի՞ց պետք է վախենա»։
Հիշեցնենք, որ Գագիկ Ծառուկյանը հունիսին կայանալիք խորհրդարանական ընտրություններին կմասնակցի «Բարգավաճ Հայաստան» կուսակցությունով և «Առաջարկ Հայաստանին» ծրագրով:
«Չի լինելու դաշինք, ընտրություններին մասնակցում է ԲՀԿ-ն։ Մարտին տեղի կունենա կուսակցության համագումարը, որի շրջանակում էլ կհրապարկվի «Բարգավաճ Հայաստանի» նախընտրական ցուցակի առաջին 30 տեղերում ընդգրկվելիք անձանց ցուցակը»,- ավել վաղ հայտարարել էր Գագիկ Ծառուկյանի խոսնակ Իվետա Տոնոյանը:
