«Ես կարծում եմ, որ մարդկային դաստիարակության կարևորագույն կետերից մեկը ներողություն խնդրելու ունակությունն է և ես հպարտ եմ, որ վարչապետն այդ ներողությունը խնդրել է»,-Աժ ճեպազրույցների սրահում ասաց ԱԺ փոխխոսնակ Ռուբեն Ռուբինյանը՝ արձագանքելով Ռոբերտ Քոչարյանի հայտարարությանը, որ մետրոյում Փաշինյանի նման տոնով խոսելը նշանակում է դաստիարակության՝ հայկական կոդի բացակայություն։
Ռուբինյանը կրկին հիշեց Պողոս Պողոսյանի սպանության դեպքը։
«Վերադառնալով Պողոս Պողոսյանի սպանությանը. Ռոբերտ Քոչարյանի թիկնապահը սպանել է «Պրիվետ, Ռոբ» ասած դաշնակցականին, դրանից հետո ոչ միայն ներողություն չի խնդրել դրա համար, մի հատ էլ հայտնի տեսանյութ կա՝ ասում է՝ այդ մարդը, եթե ողջ լիներ, մի երկու բան կասեի»,- ասաց նա։
Անդրադառնալով հայ-թուրքական հարաբերություններին՝ Ռուբինյանն ասաց, որ նորություն չկա, բայց և ժխտեց, որ բանակցային գործընթացը կանգնել է, քանի որ երկու օր առաջ է խոսել Քըլըչ-ի հետ։
«Չէ՛, չի կանգնել, բայց նոր ասելիք չունեմ»,-հակտնեց ԱԺ փոխխոսնակը:
Նա նաև հայտարարեց, թե ԵԱՏՄ-ից դուրս գալու մասին երբևիցե չենք հայտարարել։
Անդրադառնալով լրագրողի դիտարկմանը, որ երբ Նիկոլ Փաշինյանը «Ելք» դաշինքի պատգամավոր էր, նման խնմդիր է բարձրացրել՝ Ռուբինյանն ասաց. «Լսում է եղել, բայց «Քաղաքացիական պայմանագիր» կուսակցությունը երբեք, եթե նկատի ունեք 2018-ից առաջ, երբեք չի հայտարարել, որ իշխանության գալու դեպքում դուրս է գալու ԵԱՏՄ-ից։ Դրանից առաջ «Ելք» դաշինքի նախաձեռնությամբ եղել է դրա վերաբերյալ լսում»։
Լրագրողները պնդեցին, որ «Ելքը» դրա վերաբերյալ նախագիծ էր ներկայացրել ԱԺ, ԱԺ փոխխոսնակն ասաց. «Կստուգենք, ես խոստանում եմ»։
