Կառավարության այսօրվա նիստում արցախցիների բնակապահովման ծրագրի մասին քննարկումների շրջանակը վերաբերում էր աջակցության գումարների հաշվարկմանը, վարկերի տեսակներին և ծախսերի հիմնավորմանը։
Ըստ նոր կարգի՝ եթե ընտանիքում մինչև 2026 թվականի դեկտեմբերը երեխա է ծնվում, աջակցության սերտիֆիկատի գումարն ավտոմատ կերպով ավելանում է։ Այն դեպքում, երբ ընտանիքն արդեն ձեռք է բերել բնակարան, առաջացած դրական մնացորդը թույլատրվում է օգտագործել կահույքի, կենցաղային տեխնիկայի կամ հողամասի ձեռքբերման համար։ Այս գործընթացը հնարավոր է լինելու վերահսկել առցանց համակարգի միջոցով, որտեղ երևալու են անհատական հաշիվներն ու սահմանաչափերը։
Փոփոխությունը տարածվում է նաև այն շահառուների վրա, ովքեր բնակարան ձեռք բերելիս օգտվել են ոչ թե դասական հիփոթեքից, այլև այլ տեսակի վարկերից։ Մասնավորապես, խոսքը այն դեպքերի մասին է, երբ բանկային վերաֆինանսավորման արդյունքում հիփոթեքային վարկը վերակազմակերպվել է որպես «սպառողական վարկ՝ անշարժ գույքի գրավով»։ Կառավարությունը սահմանել է, որ նմանատիպ վարկ ունեցողները ևս կստանան յուրաքանչյուր անձի հաշվով նախատեսված 2 միլիոն դրամի փոխհատուցումը, քանի որ վարկի նպատակը փաստացի մնացել է նույնը։
Գումարի դրական մնացորդի իրացման գործընթացում վերանայվել են ներկայացվող փաստաթղթերի պահանջները։ Եթե նախկինում փոխհատուցում ստանալու համար անհրաժեշտ էր ներկայացնել բացառապես հաշիվ-ապրանքագրեր, ապա նոր կարգավորմամբ թույլատրվում է կիրառել նաև այլ վճարային փաստաթղթեր, այդ թվում՝ ՀԴՄ կտրոններ։ Սա հնարավորություն է տալիս կատարված գնումները (օրինակ՝ կենցաղային տեխնիկան) փոխհատուցել առանց լրացուցիչ վարչարարության։
