«Նիկոլ Փաշինյանն ի՞նչ սոցիոլոգիական հարցումներ է ստանում, նրանց մոտ ինչպիսին է պատկերը, որ որոշել է սեփական ժողովրդին սպառնալ պատերազմով»- ԱԺ ճեպազրույցների ժամանակ ասաց «Հայաստան» խմբակցության պատգամավոր Քրիստինե Վարդանյանը՝ հարցնելով, թե ինչքան պետք է քաղաքական ուժի վիճակը վատ լինի, որ դիմի ծայրահեղ քայլի։
Ընդդիմադիր պատգամավորը, նկատելով, որ իշխանությունները հայտարարում են, թե Հայաստանի դեմ կա հիբրիդային պատերազմ, այն սրվում է, Արտաքին հետախուզության ծառայությունն էլ հայտարարել է, թե բացահայտվել է մի երկրի կոնկրետ միջամտության դեպք, հարցրեց, թե իշխանությունները ինչով են կաշկանդված, որ երկրի անունը չեն հրապարակում։
«Մի՛ վախեցեք, մի՛ վախեցեք, այդքան սարսափելի չէ, ասե՛ք Ռուսաստան, Ռուսաստան, եթե այդտեղից սպառնալիք կա։ Միգուցե՞ չեք ասում, որ գնաք Բրյուսել մի բան ասե՞ք, գնաք Մոսկվա մի այլ բան ասե՞ք»,-հայտարարեց Վարդանյանը։
Ընդդիմադիր պատգամավորը նկատեց, որ ՔՊ-ն մի կողմից հայտարարում է, որ «Գյումրի-2» են ուզում անել, մյուս կողմից հայտարարում է, թե «Հայաստան» դաշինքը ընտրությունների ժամանակ չի հաղթահարի անցողիկ շեմը և խորհուրդ տվեց վերջապես ընտրություն կատարել երկու իրար բացառող թեզերի միջև։
Նա նշեց, որ ընդդիմադիր ուժերը հանրագումարով ունեն շատ ավելի շատ ձայներ, քան Նիկոլ Փաշինանը։
«Մենք ասում ենք, եթե մեզնից է կախված փոփոխությունը, մենք, բնականաբար չենք առաջնորդվելու սկզբունքով, որ պարտադիր մեր թեկնածուն պետք էլինի վարչապետ, առաջնորդվելու ենք փոփոխության կայացման սկզբունքով»,-հայտարարեց «Հայաստան» խմբակցության պատգամավորը։
