Ուկրաինան և Սաուդյան Արաբիան ստորագրել են համաձայնագիր պաշտպանական համագործակցության վերաբերյալ։
Ուկրաինայի նախագահ Վլադիմիր Զելենսկին հայտարարել է, որ Սաուդյան Արաբիա կատարած իր պաշտոնական այցի շրջանակում ստորագրվել է երկու երկրների պաշտպանության նախարարությունների միջև համագործակցության համաձայնագիր։
Նախագահի խոսքով՝ Կիևը պատրաստ է կիսվել իր փորձով և տեխնոլոգիական լուծումներով՝ նպաստելով Սաուդյան Արաբիայի պաշտպանունակության և քաղաքացիական բնակչության անվտանգության բարձրացմանը։ Զելենսկին ընդգծել է, որ Ուկրաինան արդեն մի քանի տարի արդյունավետորեն դիմադրում է հրթիռային և անօդաչու թռչող սարքերի հարձակումներին՝ կուտակելով զգալի փորձ այս ոլորտում։
Հանդիպման ընթացքում Զելենսկին և Սաուդյան Արաբիայի ժառանգորդ արքայազն Մուհամմեդ բեն Սալման Ալ Սաուդը քննարկել են նաև Մերձավոր Արևելքի անվտանգության հարցերը, էներգետիկ շուկաների զարգացումները և երկկողմ համագործակցության հեռանկարները։ Կողմերը անդրադարձել են նաև տարածաշրջանային լարվածությանը և Իրանի շուրջ ստեղծված իրավիճակին։
Ուկրաինայի նախագահը նշել է, որ Սաուդյան Արաբիան ունի ռեսուրսներ և հնարավորություններ, որոնք կարող են հետաքրքրել Ուկրաինային, և հավելել, որ ձևավորվող համագործակցությունը կարող է լինել փոխշահավետ։
Վերլուծաբանների կարծիքով՝ այս համաձայնագիրը կարող է ընդլայնել Ուկրաինայի դերը ոչ միայն որպես անվտանգության սպառող, այլև որպես փորձ և տեխնոլոգիաներ փոխանցող գործընկեր միջազգային հարթակում։
