Հայաստանի ԳԽ և ԼՂ ԱԺ նախկին պատգամավոր Վահրամ Աթանեսյանը «Ֆեյսբուքի» իր էջում գրել է․
Ազգային ժողովի մակարդակով հայտարարել են, որ Նիկոլ Փաշինյանը Արցախի ժողովրդի անունից նրա ինքնորոշման իրավունքի հարցով Ադրբեջանի եւ միջազգային կառույցների հետ բանակցելու իրավունք չունի, օրինական իշխանությունը ենթարկեցրել են «Արցախի դիմադրության եւ զարգացման ճակատին», պնդել են, որ Պաշտպանության բանակը ոչ թե վերակազմավորման, այլ վերազինման, արդիականացման պետք է ենթարկվի, որպեսզի լինի ռազմավարական նշանակության մարտական խնդիրներ լուծելու ունակ զինվորական կազմավորում, Բաքու մեկնելու եւ բանակցություններ սկսելու առաջարկությունը երկու անգամ մերժել են, ի վերջո իշխանափոխություն են իրականացրել, որ Ադրբեջանի ահաբեկչական հարձակման պատճառ է հանդիսացել, ստորագրել են ռազմական կապիտուլյացիայի ակտ եւ ԼՂՀ լուծարման հրամանագիր, հիմա Նիկոլ Փաշինյանին մեղադրում են, թե ուզածն այն էր, որ արցախցիները մնային եւ ցեղասպանության ենթարկվեին: Լավ, էս մարդիկ Աստծոց երկյուղ չունեն, վաղուց է հայտնի, իրենց խղճի առաջ մանանեխի մի հատիկի չափ պատասխանատվություն չեն զգու՞մ: Մարդ զոհ տված համագյուղացու, բարեկամի, հարեւանի աչքերին ուղիղ չի կարողանում նայել, սրանք էս ի՞նչ են անում: Երկու հարյուր երեսունութ զոհի մասին են խոսում: Նրանց արյունը ձեր խղճի վրա է:
