Bloomberg միջազգային հեղինակավոր պարբերականն անդրադարձել է Հայաստանում արհեստական բանականության (ԱԲ) տվյալների կենտրոնի ստեղծման ծրագրին և դրա շրջանակում կնքված սինդիկացված վարկային համաձայնագրին։
Հոդվածում նշվում է, որ հայաստանյան առաջատար ֆինանսական կառույցները 300 միլիոն դոլարի ֆինանսավորում կհատկացնեն Firebird AI ընկերությանը՝ տվյալների կենտրոնի կառուցման նպատակով: Ընդգծվում է նաև, որ այս համատեղ համաձայնագիրը նման ձևաչափով իրականացվող առաջին խոշոր ներդրումային նախագիծն է Հայաստանում:
Պարբերականը մեջբերել է ՀՀ բարձր տեխնոլոգիական արդյունաբերության նախարար Մխիթար Հայրապետյանի ելույթը, որտեղ նախարարը կարևորել է այս նախաձեռնության նշանակությունը երկրի տեխնոլոգիական զարգացման և գիտատեխնիկական ներուժի ամրապնդման տեսանկյունից։
Նախարարն ընդգծել է, որ ծրագիրը բխում է 2025 թվականին Հայաստանի և ԱՄՆ-ի միջև արհեստական բանականության և կիսահաղորդիչների ոլորտներում ստորագրված երկկողմ համագործակցության հուշագրից։
Հոդվածում նշվում է նաև, որ Firebird AI-ի նախագիծը մշակվում է տեխնոլոգիական հսկաների՝ Nvidia և Dell Technologies ընկերությունների հետ համագործակցությամբ։ Այն իրականացվում է ՀՀ կառավարության աջակցությամբ՝ նպատակ ունենալով զարգացնել Հայաստանում արհեստական բանականության ժամանակակից ենթակառուցվածքները։
