«Kamertoon» ընկերությունը ներկայացրել է Հրազդան կիրճի վերափոխման լայնածավալ հայեցակարգ։ Նախագիծը նախատեսում է ստեղծել շուրջ 10 կիլոմետր երկարությամբ բնական-քաղաքային այգի՝ TUMO ստեղծարար տեխնոլոգիաների կենտրոնի հարակից տարածքից մինչև Երևանյան լիճ։
Ընկերությունն արդեն սկսել է նախնական աշխատանքները։ Նախապատրաստական փուլի շրջանակում «Kamertoon»-ը մեկնարկել է Մաշտոց–Պարոնյան խաչմերուկի ստորգետնյա անցումի հիմնանորոգումը, որը հանդիսանում է դեպի Հրազդանի կիրճ տանող հիմնական մուտքերից մեկը։
«Hrazdan Nature Park» հայեցակարգն արդեն ներկայացվել է Հայաստանի վարչապետին և Երևանի քաղաքապետին։ Սպասվում է իշխանությունների որոշումը՝ ծրագրի հաջորդ փուլերին անցնելու համար։ Նախագծի իրականացման ընդհանուր արժեքը գնահատվում է շուրջ 15 միլիոն ԱՄՆ դոլար։
Նախագիծը մշակվել է «Proforma» ճարտարապետական բյուրոյի կողմից։
Հիմնական գոտիները՝
🔸Երեք կամուրջների այգի․ ակվեդուկի, Հաղթանակի կամրջի և Կարմիր կամրջի միավորում մեկ միասնական հետիոտնային երթուղու մեջ։
🔸Սպորտային և մշակութային կլաստերներ․ թենիսի և փադելի խաղահրապարակներ, ժայռերի երկայնքով մշակութային արահետ և «Odeon» ամֆիթատրոն։
🔸Hrazdan Baths․ հանրային լողավազանների համակարգ, որը վերականգնում է ջրի մոտ հանգստի մշակույթը։
Իրականացման փուլերը՝
▪️Փուլ 1․ «Երեք կամուրջների այգի» (1000 մ)՝ առաջնահերթ հատված, որը միավորում է պատմական հուշարձանները։
▪️Փուլ 2․ ամբողջական միացում՝ տարածքի համալիր բարեկարգմամբ՝ TUMO ստեղծարար տեխնոլոգիաների կենտրոնից մինչև Երևանյան լիճ։
