Հայաստանի ԳԽ և Արցախի ԱԺ նախկին պատգամավոր Վահրամ Աթանեսյանը «Ֆեյսբուքի» իր էջում գրել է.
Ի գիտություն «ադրբեջանագետների» պետք է ասել, որ մարտի 31-ը «ադրբեջանցիների ցեղասպանության օր» է սահմանվել Ադրբեջանի նախագահ Հեյդար Ալիեւի 1998թ. մարտի 26-ի հրամանագրով, որտեղ սահմանված են «պատմագիտական» բոլոր թեզերը, որ պաշտոնական Բաքվի քաղաքական խոսույթի հիմքն են եղել վերջին երկուսուկես տասնամյակներին:
Իհարկե, կարելի է ասել, որ այն ժամանակ մենք հաղթած էինք: Բայց երբ հարեւան երկրի նախագահի հրամանագրով Հայաստանը ճանաչվում է «պետական արհեստածին կազմավորում», իսկ դու գնում եւ նրա հետ լուրջ-լուրջ քննարկում ես Արցախը Լաչինի միջանցքով Հայաստանին միավորելու՝ նրա կողմից արված առաջարկությունը, ապա դա դիվանագիտության պատմության մեջ նախադեպը չունեցող աղետաբեր «նոու-հաու» է:
Շարունակեք տարփողել, որ Հեյդար Ալիեւը «ծնկաչոք հրադադար էր խնդրում», բայց ասեք միայն ձեր խոհանոցում, ձեր կանանց, զավակների եւ թոռների համար: Հայաստանը վերստին թունավորվելու սերունդ չունի:
