2008թ. «Մարտի 1»-ի քրեական գործի շրջանակներում շարունակվում են ծավալուն քննչական և փորձագիտական գործողությունները։ Մասնավորապես, Radar Armenia-ին հայտնի դարձավ, որ փորձաքննության են հանձնվել Զինված ուժերի ու իրավապահ կառույցների հաշվեկշռում գտնվող մի շարք զինատեսակներ։
Ըստ գլխավոր դատախազության, ուսումնասիրության են ենթարկվել զինված ուժերում հաշվառված 93 միավոր «ԱԿ-74» տեսակի, 23 միավոր «ԱԿՍ74ՈՒ» տեսակի (5,45 մմ տրամաչափի) «Կալաշնիկով» ինքնաձիգեր, ինչպես նաև 1 միավոր «ՌՊԿ-74» տեսակի ձեռքի գնդացիր (5,45 մմ) և 1 միավոր «ՍՎԴ» տեսակի նշանառու հրացան (7,62 մմ)։
Բացի այդ, հետազոտվել է 1306 միավոր 9 մմ տրամաչափի «Մակարով» տեսակի ատրճանակ, որոնցից 217-ը ներկայացվել է Ոստիկանության զորքերից, 300-ը՝ Ներքին գործերի նախարարության ոստիկանության այլ ստորաբաժանումներից, իսկ 789-ը՝ Պաշտպանության նախարարությունից։
Դատախազությունից հայտնում են նաև, որ ներկայում փորձագետի կողմից շարունակվում է Ներքին գործերի նախարարության ոստիկանության պետական պահպանության գլխավոր վարչության հատուկ նշանակության գումարտակի հաշվեկշռում գտնվող «Մակարով» տեսակի ատրճանակների փորձաքննությունը։
