Երևանի քաղաքապետարանն սկսել է ուսումնասիրություն Մալաթիա-Սեբաստիա վարչական շրջանի թիվ 94 մսուր-մանկապարտեզում ստեղծված իրավիճակի վերաբերյալ՝ նպատակ ունենալով բազմակողմանի գնահատել տնօրենի գործողությունները և ապահովել հաստատության բնականոն աշխատանքը։
Քաղաքապետարանի աշխատակազմի հանրակրթության վարչության պետ Մարգարիտ Խաչատրյանը Radar Armenia-ի հետ զրույցում նշել է, որ առաջիկայում նախատեսված են հանդիպումներ ինչպես ծնողների, այնպես էլ մանկապարտեզի անձնակազմի հետ՝ խնդիրը բոլոր կողմերից ուսումնասիրելու համար։
«Այս պահին մեր առաջնահերթությունը առողջ բարոյահոգեբանական միջավայրի ապահովումն է։ Եթե որևէ աշխատակից իր պարտականությունները չի կատարել պատշաճ կերպով կամ թույլ է տվել անհամատեղելի խախտումներ, անպայման կհետևի համապատասխան արձագանք․ լինի կարգապահական տույժ, թե այլ միջոց»,– ընդգծել է Խաչատրյանը։
Հիշեցնենք, որ մանկապարտեզում լարվածությունը սրվել է ծնողների բողոքներից հետո։ Ավելի քան 190 ծնող ստորագրել է դիմում-բողոք՝ պահանջելով տնօրեն Փառանձեմ Միրիբյանի ազատումը։ Նրանց պնդմամբ՝ տնօրենի վարքագծի հետևանքով վերջին մեկ տարվա ընթացքում մանկապարտեզից կադրերը հեռացել են, իսկ վերջերս միանգամից 10 դաստիարակ ներկայացրել են աշխատանքից ազատման դիմում։
Ծնողների բարձրացրած հարցին՝ արդյոք նման ծավալի բողոքը կարող է հիմք հանդիսանալ տնօրենի ժամանակավոր պաշտոնակատար նշանակելու համար, Խաչատրյանը պատասխանել է, որ ցանկացած բողոք մեկ անձից արդեն իսկ բավարար հիմք է ուսումնասիրություն սկսելու համար։
«Անկախ ստորագրությունների քանակից՝ եթե կա հիմնավորված անհանգստություն, այն հայտնվում է մեր ուշադրության կենտրոնում։ Այս փուլում մեկնաբանել տնօրենի հնարավոր ազատման հարցը չեմ կարող»,– նշել է նա։
Քաղաքապետարանից վստահեցնում են՝ բոլոր կողմերի հետ հանդիպումներից հետո կտրվի վերջնական գնահատական, և անհրաժեշտության դեպքում կձեռնարկվեն համապատասխան քայլեր։
