«Այսօր ստիպված ենք քննարկելու խնդիր, թե ներպետական հարաբերություններում ինչպես կարող են եկեղեցին պաշտպանել սեփական պետական իշխանությունից»,- ԱԺ «Պատիվ ունեմ» խմբակցության կողմից «Պետություն-ազգային եկեղեցի հարաբերությունների ներկա վիճակի առնչությամբ» թեմայով խորհրդարանական լսումների ժամանակ ասաց Մայր Աթոռի Գերագույն հոգևոր խորհրդի անդամ, իրավագիտության դոկտոր, պրոֆեսոր Գևորգ Դանիելյանը։
Նա ընդգծեց, որ ոչ թե եկեղեցին են պաշտպանում, այլ պետականությունը. «Եթե որևէ մեկին թվում է, թե եկեղեցու նկատմամբ արշավը պարզապես թիրախավորում է Հայ ազգային եկեղեցուն, սխալվում են, թիրախավորվում է պետականությունը, սահմանադրական կարգը»։
Գ.Դանիելյանն ընդգծեց, որ դժվար է եկեղեցուն տկարացնել, բայց «մեզ մենք զրկել ենք այն մեծ հնարավորություններից, որ կարող էինք ունենալ, եթե ճիշտ, իրավաչափ սահմանադրական քաղաքականություն իրականացնեինք»։
«Եկեղեցին մնում է ամուր»,- ասաց նա։
Գ.Դանիելյանը հարցադրում արեց՝ ո՞րն է իշխանությունների հակաեկեղեցական արշավի վերջնական նպատակը։
«Պոլսո պատրիարաքը մի արտահայտություն արեց, որ նպատակահարմար է Գերագույն հոգևոր խորհրդի փոխարեն ստեղծել սինոդ։ Սինոդ առաջին անգամ ստեղծել է Օսմանյան Թուրքիան, որպեսզի կարողանա ազգային եկեղեցին դարձնի կառավարելի, վերահսկելի։ Նույն այս ինստիտուտը կիրառեց նաև ցարական Ռուսաստանը։
Եթե մենք ենք ուզում սինոդ ստեղծել, նշանակում է՝ մենք իսկապես ուզում ենք եկեղեցին դարձնել կառավարելի, վերահսկելի։ Դրա մասին պետք է պարզ խոսել, այլապես օգտագործել տերմիններ, որոնք խնդրի հետ իբրև թե կապ չունեն, իրականում կապ ունեն»,- ասաց նա։
