Ադրբեջանի նախագահ Իլհամ Ալիևը հայտարարել է, որ «Զանգեզուրի միջանցքի» ավտոմոբիլային ճանապարհի աշխատանքների 90%-ը և երկաթգծի 70%-ն արդեն ավարտված են։ Նրա խոսքով՝ Ադրբեջանի տարածքում տրանսպորտային ողջ ենթակառուցվածքը, ներառյալ՝ Բաքվի նավահանգիստն ու օդանավակայանները, բերվել են լիակատար պատրաստվածության վիճակի։
Ալիևը նշել է, որ Թուրքիայում Կարս-Նախիջևան երկաթգծի շինարարության մեկնարկը թույլ կտա ստեղծել «Միջին միջանցքի» նոր ճյուղը, որի թողունակությունը նախնական փուլում կկազմի տարեկան 15 միլիոն տոննա բեռ․
«Այս նախագծերի համակարգված և համաժամանակյա իրականացումը կբացի նոր միջազգային միջանցք՝ Միջին միջանցքի մի ճյուղը: Մեր կառուցած երկաթուղային ենթակառուցվածքը նախատեսված է սկզբնական փուլում 15 միլիոն տոննա բեռ տեղափոխելու համար՝ հետագա աճի ներուժով։ Ամեն դեպքում, 15 միլիոն տոննա հզորությամբ նոր միջանցքի բացումը մեծ նշանակություն ունի ոչ միայն մեր երկրների, այլև՝ ավելի լայն տարածաշրջանի համար»,- ասել է նա։
Ադրբեջանի առաջնորդը հույս է հայտնել, որ նախագիծը մոտ ապագայում ամբողջությամբ կիրականացվի՝ շեշտելով, որ այն բխում է տարածաշրջանային կայունության և տնտեսական փոխշահավետ համագործակցության շահերից։
