«Վերջին շրջանում առաջացել են բազմաթիվ երևույթներ, որոնք լուրջ հարցեր են առաջացնում պետության և ազգային եկեղեցի հարաբերությունների սահմանների վերաբերյալ»,- ԱԺ-ում ունեցած ելույթում ասաց «Պատիվ ունեմ» խմբակցության պատգամավոր Տիգրան Աբրահամյանը։
Նշենք, որ հենց «Պատիվ ունեմ» խմբակցության նախաձեռնությամբ այսօր տեղի ունեցան խորհրդարանական լսումներ, որոնց թեման «Պետություն-ազգային եկեղեցի հարաբերությունների ներկա վիճակի առնչությամբ» ՀՀ Ազգային ժողովի հայտարարության նախագիծն էր:
Տ.Աբրահամյանը նշեց, որ եկեղեցին, ինչպես ցանկացած կրոնական կազմակերպություն, ունի ներքին կարգ ու կանոններ, որոշումների ընդունման ընթացակարգեր։
«Պետությունը կարող է հետևել, որ երկրում պահպանվեն օրենքները, բայց պետությունը որևէ դեպքում չի կարող փոխարինել եկեղեցու ներքին որոշումների ընդունման մեխանիզմները, չի կարող թելադրել, թե ով կարող է իրականացնել հոգևոր ծառայություն, ով ոչ, ինչ կարգով պետք է գործեն եկեղեցական մարմինները, ինչ պետք է տեղի ունենա ծեսերի ու պատարագների ժամանակ»,- ասաց ընդդիմադիր պատգամավորը։
Տիգրան Աբրահամյանի խոսքով, հայտարարության նախագիծն առաջարկում է կոնկրետ գործնական լուծումներ: Դրանցից առաջինն իրավական թափանցիկությունն է, այսինքն՝ իրավապահ և քննչական մարմինները պետք է ունենան հստակ հրապարակային չափանիշներ, թե ինչպես են իրենց գործողություններում հաշվի առնելու խղճի և կրոնի ազատությունը:
Երկրորդը՝ միջազգային իրավական խորհրդատվության հանգամանքն է: Առաջարկվում է դիմել Վենետիկի հանձնաժողովին՝ հեղինակավոր մասնագիտական կարծիք ստանալու համար առ այն, թե կրոնական կազմակերպության ներքին կառավարման հարցերում ինչ սահմաններ ունի պետական միջամտությունը և ինչ չափով պետք է առաջնորդվեն դատարաններն ու այլ մարմինները նման վեճերում:
Նախագծով առաջարկվող հաջորդ քայլերի շարքում են արդարադատության ապաքաղաքականացումը, Մարդու իրավունքների պաշտպանի ակտիվ դերակատարումը:
«Եթե պետությունն այսօր կարող է կամայականորեն միջամտել եկեղեցու ներքին գործերին, հայրենիքը, եկեղեցին պաշտպանելու, դիրքորոշում արտահատելու համար հոգևորականեր կալանավորել, ապա հասկանալի է, որ չունի որևէ բարդույթ՝ հատելու կարմիր գծերը, որոնք երկիրը շատ ավելի են մոտեցնում անդառնալիության կետին»,- ասաց Աբրահամյանը։
