Ապրիլի 1-ին Մոսկվայում փակ դռների հետևում տեղի ունեցած Վլադիմիր Պուտինի և Նիկոլ Փաշինյանի բանակցությունները եղել են անկեղծ և անհրաժեշտ, հայտնել է Դմիտրի Պեսկովը։
«Մոտ երկու ժամ զրուցել են նախագահը և վարչապետը։ Զրույցը եղել է անկեղծ, օգտակար, անհրաժեշտ։ Կողմերը միմյանց են ներկայացրել իրենց դիրքորոշումները՝ հատկապես Հայաստանի առաջիկա ընտրությունների համատեքստում, ինչպես նաև առևտրատնտեսական համագործակցության հիմնական հարցերի շրջանակում, որոնք գտնվում են օրակարգում»։
Վլադիմիր Պուտինը ցանկանում է, որ Ղարաբաղի հարցում Ռուսաստանի մասին հիշատակումներ չլինեն, ասել է Դմիտրի Պեսկովը։
«Միակ բանը, որը ցանկանում է նախագահ Պուտինը և որը ցանկանում է Ռուսաստանը, այն է, որ այս հարցը քննարկելիս հերթական անգամ մեզ չհիշատակեն, քանի որ դա ամբողջությամբ որոշում է այն ղեկավարության, որը գտնվում է իշխանության Երևանում։ Եվ Ռուսաստանն այստեղ բացարձակապես որևէ կապ չունի»։
Պեսկովը նաև նշել է, որ կողմնորոշումները, որոնք ընտրում է հայկական ղեկավարությունը, ՌԴ բարձր հետաքրքրության առարկան են։ Եվ իրենք իրենց իրավունք ենք վերապահում իրենց գործընկերների հետ հստակեցնել նրանց ծրագրերը։
Պեսկովը նաև անդրադարձել է Հայաստանի՝ ԵԱՏՄ անդամակցության վերաբերյալ հարցերին։ Նրա խոսքով՝ Եվրասիական տնտեսական միության անդամակցությունը Հայաստանին հնարավորություն է տալիս զարգանալ ավելի արագ տեմպերով՝ միջինում ավելի արագ, քան Ռուսաստանը և ԱՊՀ երկրները։
«Ինչ-որ պահի հարկավոր կլինի ընտրություն կատարել։ Սակայն հայկական ղեկավարությունը կարծում է, որ այս պահին ոչինչ չի խանգարում ԵԱՏՄ-ին, ոչինչ չի սպառնում ԵԱՏՄ-ին, իսկ եթե նման իրավիճակ առաջանա, ապա նրանք այն կքննարկեն, կկշռադատեն բոլոր կողմերն ու դեմերը և կկայացնեն որոշում։ Սա նույնպես ինքնիշխան դիրքորոշում է, բայց առնվազն շատ կարևոր է, որ Երևանում դա հասկանում են»։
Պեսկովը հայտնել է, որ Հայաստանը ըմբռնումով է մոտեցել Ռուսաստանի մտահոգություններին․ «Ըմբռնումը ցուցաբերվել է։ Կտեսնենք, թե ինչպես հետագայում հարաբերությունները կզարգանան գործնականում»։
