Ադրբեջանի արտաքին գործերի նախարարությունը դիվանագիտական խողովակներով իր դժգոհությունն է հայտնել Ռուսաստանի պաշտոնական շրջանակներին՝ անթույլատրելի համարելով Լեռնային Ղարաբաղի թեմայի օգտագործումը հայ-ռուսական հարաբերությունների համատեքստում։ Բաքվի պնդմամբ՝ Ռուսաստանի նախագահի և Հայաստանի վարչապետի վերջին հանդիպման ժամանակ և դրանից հետո հնչած հանրային հայտարարությունները վերաբերում են Ադրբեջանի ներքին գործերին և հանդիսանում են քաղաքական շահարկումների առարկա։
Ադրբեջանական կողմի արձագանքի համար առիթ է հանդիսացել նաև ՌԴ նախագահի մամուլի քարտուղար Դմիտրի Պեսկովի հարցազրույցը, որտեղ նա անդրադարձել էր Ղարաբաղն Ադրբեջանի կազմում ճանաչելու հարցին։ Բաքուն վերահաստատել է իր դիրքորոշումը, որ տարածքային ամբողջականությունը հիմնված է միջազգային իրավունքի վրա և ենթակա չէ այլ պետությունների որոշումներին։
Ադրբեջանի ԱԳՆ-ն ակնկալում է, որ Մոսկվան զերծ կմնա իր սուվերենությանը վերաբերող հարցերը հանրային պարզաբանումների առարկա դարձնելուց, հատկապես հայ-ռուսական ներկայիս բարդ հարաբերությունների ֆոնին։
«Հերթական անգամ ռուսական կողմին հայտնում ենք մեր ակնկալիքները, որ Ադրբեջանի ինքնիշխանությանը վերաբերող հարցերը չեն դառնա հարաբերությունների հրապարակային պարզաբանման առարկա ընթացիկ ժամանակահատվածում, երբ ռուս-հայկական հարաբերությունները շարունակում են բարդ մնալ», – նշվում է հայտարարության մեջ:
