Ազգային ժողովի արտահերթ նիստում ՔՊ խմբակցության անդամ Արուսյակ Ջուլյակյանը ներկայացրեց իր, ՔՊ-ականներ Ալխաս Ղազարյանի, Արթուր Հովհաննիսյանի նախաձեռնած «ՀՀ Ընտրական օրենսգիրք» սահմանադրական օրենքում լրացումներ և փոփոխություններ կատարելու մասին նախագիծը, որը պետք է քննարկվի 24–ժամյա ռեժիմով։
Ըստ նրա, հրատապությունը կայանում է նրանում, որ հունիս 7-ին նախատեսված են ԱԺ հերթական ընտրություններ, նախքան այդ պետք է ընտրությունների կազմակերպման վերաբերյալ արդյունավետ մեխանիզմներ նախաձեռնել։
Նախագծում, ի թիվս այլ լրացումների ու փոփոխությունների, նաև առաջարկվում է. «Կուսակցությունների դաշինքի անվանումը չի կարող պարունակել անձնանուն, պետական և տեղական ինքնակառավարման մարմինների անվանումներ կամ դրանց շփոթելու աստիճան նման անվանումներ և (կամ) դրանց հոլովաձեւեր: Կուսակցությունների դաշինքի անվանումը չի կարող պարունակել վիրավորական կամ զրպարտչական բնույթի բառեր կամ այլ արտահայտություններ:»:
«Հայաստան» խմբակցության պատգամավոր Գեղամ Մանուկյանն ասաց. «Լավ է գոնե արդեն կայքում դրված է նախագիծը, որ հասցնենք ծանոթանալ։ Շատ անկյունաքարային բան է՝ պատգամավորները գալիս են արտահերթ նիստի ու դեռ տեղյակ չեն փոփոխությունների մասին»։
Նա նշեց, որ կա միջազգային պրակտիկա, Հայաստանին տրված խորհրդատվություն, որ ընտրություններից առաջ առնվազն 1 տարվա ընթացքում խաղի կանոններ չեն փոխվում։
«Որևէ մեկի համար էլ գաղտնիք չէ, թե այս Ընտրական օրենսգրքի փոփոխության նպատակն ինչն է։ Ընտրություններին մնացել է երկու ամիս, դուք կոչում եք դա վրիպակ, բայց անկյունաքարային փոփոխություն է, որն առաջարկում եք»,- ասաց Մանուկյանը։
Ջուլհակյանն ասաց, որ խորհուրդ չի տրվում ԸՕ-ում փոխոխություններ կատարել ընտրություններից կարճ ժամանակ առաջ, Վենետիկի հանձնաժողովն ունի նման ռեկոմենդացիա, բայց դա վերաբերելի է միայն հիմնարար կանոններին։
