Կառավարության նիստում քննարկվում է «ՀՀ պետական բյուջեի մասին» օրենքում փոփոխություններ կատարելու նախագիծը, որով գումար է հատկացվելու Հրազդանի կիրճի վերակառուցման համար։
Երևանի քաղաքապետ Տիգրան Ավինյանը նշել է, որ Հրազդանի կիրճի բարեկարգման ծրագիրը ներառում է նոր լանդշաֆտ, ճարտարապետական լուծումներ, հարմարավետ զբոսայգի, հանգստի գոտիներ, սպորտային միջոցառումների անցկացման հարթակներ, կինոդիտման վայր, ինչպես նաև սրճարան, որը կդառնա կիրճում սոցիալական շփումների կենտրոն. «Սրճարանի պահանջը կար. դա կիրճում սպորտով զբաղվող բազմաթիվ քաղաքացիների խնդրանքն ու պահանջն էր»,- ասել է նա։
Քաղաքապետը նաև նշել է. «Մենք իրականացրել ենք ամբողջ կիրճի խորը վերլուծություն՝ ուսումնասիրելով ֆլորան, ֆաունան և մշակութային ժառանգություն հանդիսացող հատվածները։ Հստակ սահմանագծել ենք կիրճը և սպասում ենք ՇՄ նախարարության կողմից օրենսդրական փոփոխություններին, որից հետո Երևանի ավագանին ամբողջ կիրճը կճանաչի որպես համայնքային հատուկ պահպանվող տարածք»։
Ինչ վերաբերում է նախագծին, ըստ քաղաքապետի՝ կարևոր է, որ տվյալ հատվածն արդեն «ապրում է»։ «Մարզվող, վազքով, քայլքով ու ձկնորսությամբ զբաղվող քաղաքացիները հիմնականում կենտրոնանում են այդտեղ։ Մեր խնդիրն այդ ժամանցն ավելի հարմարավետ դարձնելն է»,- նշել է Ավինյանը։
