ԱՄՆ նախագահ Դոնալդ Թրամփի վարչակազմը դիտարկում է ՆԱՏՕ-ի այն անդամ երկրներից ամերիկյան զորքերի դուրսբերման հնարավորությունը, որոնք հրաժարվել են աջակցել Վաշինգտոնին Իրանի դեմ ռազմական գործողությունների ընթացքում։ Ինչպես հայտնում է The Wall Street Journal-ը, մշակվող նախագիծը նախատեսում է զինվորական անձնակազմի և տեխնիկայի տեղափոխում այն պետություններ, որոնք առավել հավատարիմ դաշնակից են գտնվել պատերազմի ժամանակ։
Այս պլանը, որն արդեն ստացել է Սպիտակ տան բարձրաստիճան պաշտոնյաների աջակցությունը, համարվում է Թրամփի նախկինում հնչեցրած՝ ՆԱՏՕ-ից լիովին դուրս գալու սպառնալիքների ավելի մեղմ, բայց գործնական տարբերակը։ Ըստ վարչակազմի ներկայացուցիչների՝ հնարավոր է փակվեն ամերիկյան ռազմաբազաները եվրոպական առնվազն մեկ երկրում, որպես հիմնական թեկնածուներ նշվում են Գերմանիան կամ Իսպանիան։
Միևնույն ժամանակ, ամերիկյան կոնտինգենտի հնարավոր ավելացում է սպասվում Լեհաստանում, Ռումինիայում, Լիտվայում և Հունաստանում։ Այս երկրները Վաշինգտոնի կողմից դասակարգվել են որպես հուսալի դաշնակիցներ, որոնք կանգնել են ԱՄՆ-ի կողքին իրանական ճգնաժամի փուլում։
Վերլուծաբանները նկատում են, որ զորքերի նման վերաբաշխումը կարող է հանգեցնել ամերիկյան ուժերի էլ ավելի մոտեցմանը Ռուսաստանի սահմաններին։ Կանխատեսվում է, որ այս տեղաշարժերը լուրջ դիմադրության և դժգոհության կհանդիպեն պաշտոնական Մոսկվայի կողմից՝ հավելյալ լարվածություն ստեղծելով միջազգային անվտանգության համակարգում։
