«Գնում ենք ընտրությունների մեր գաղափարների հաղթանկի ակնկալիքով՝ որպես Հայաստանին ինքնիշխան խաղաղություն բերելու ունակ միակ քաղաքական ուժը»,-լրագրողների հետ ընթացող հանդիպմանը հայտնեց ՀԱԿ համակարգող, ՀԱԿ-ի կողմից վարչապետի թեկնածու հայտարարված Լևոն Զուրաբյանը։
Նա հիշեցրեց, որ հունիսի 7-ին նախատեսված խորհրդարանական ընտրություններին ՀԱԿ-ը մասնակցելու իր սեփական ցուցակով։
Զուրաբյանն ասաց՝ կարծում են այս ընտրությունների գլխավոր հարցը խաղաղության մասին է։
«Գիտեք, ով ճիշտ է գուշակում գլխավոր հարցը ընտրությունների և ճիշտ է կառուցում իր քարոզարշավը, նա էլ ունի ամենամեծ շանսերն այդ ընտրություններում հաջողության հասնելու համար։ Նիկոլ Փաշինյանը շատ լավ գիտի դա, և դրա համար ընտրել է այդ կարգախոսը, գիտեք իր դատարկ սրտիկը, չգիտես ինչու, կարմիր ձեռքերով։ Կարծես ինքը հասկանում է, որ իր ձեռքերն արյունոտ են ինչ-որ իմաստով։ Նա որոշել է այդ կարգախոսով գնալ ընտրություններին, ավելին, որոշել է տիրանալ այդ մենաշնորհին, սակայն գործ ունենք հերթական մեծ խարդախության հետ»,-ասաց Զուրաբյանը։
ՀԱԿ համակարգողի խոսքով, Փաշինյանը փորձում է 1.5 տարի ահմանին չկրակելը, Ադրբեջանի տարածքով Ալիևի թույլտվությամբ բենզին բերելը ներկայացնել որպես խաղաղություն։
«Բայց դա խաղաղություն չէ, Ադրբեջանը հրաժարվում է ստորագրել խաղաղության պայմանագիրը, մեր գերիները շարունակվում են տանջվել Բաքվի բանտերում։ Ադրբեջանի լրատվամիջոցները, քաղաքագետները շարունակում են խոսել Զանգեզուրի և այսպես կոչված «Արևմտյան Ադրբեջանի ու այլ տարածքների» ազատագրման համար։ Նրա ստորագրած ԹՐԻՓՓ-ը մնացել է մտադրությունների արձանագրության մակարդակի վրա ու վերջին զարգացումների արդյունքում կարելի է ասել, որ կորցնում է իր կենսունակությունը։ Ադրբեջանի կողմից առաջ են քաշվում պահանջներ, որոնք սպառնում են մեր ինքնիշխանությանն ու ժողովրդավարությանը; Ուրեմն նա սուտ է ասում, որ խաղաղություն է բերել, սուտ են ասում, որ խաղաղության կուսակցություն են»,-ասաց Զուրաբյանը՝ հիշեցնելով, որ 2021-ին էլ հայտարարում էին, որ խաղաղության դարաշրջան են բերել, արդյունքում ոչնչացվեց Արցախը, Ադրբեջանը գրավեց Հայաստանի ինքնիշխան տարածքները։
ՀԱԿ ներկայացուցչի խոսով, այսքան ստերից հետո Փաշինյանը հանդգնում են իրենց ներկայացնել խաղաղության կուսակցություն, «մինչդեռ Փաշինյանն ու իր թիմը ապացուցված պատերազմի կուսակցություն է։ Խաղաղության հեռանակարը կործանել է հենց ինքը՝ Փաշինյանը՝ մերժելով 2019 թ. պլանը, և մենք միակ կուսակցությունն ենք, որ կարող ենք դրա մասին բաց ճակատով ասել»։
