«Իհարկե, ադրբեջանական կողմին չափազանց հետաքրքիր է, թե ինչ է սպասվում Հայաստանին առաջիկա խորհրդարանական ընտրություններում, որովհետև, մեծագույն առումով, խաղաղության գործընթացի ապագան կախված է հենց այդ փոփոխականից»,- Ադրբեջանից վերադառնալուց հետո կազմակերպված ասուլիսի ժամանակ ասաց «Հայկական խորհուրդ» վերլուծական կենտրոնի նախագահ, «Խաղաղության կամուրջ» նախաձեռնության հայաստանյան համակարգող Արեգ Քոչինյանը։
Նա ընդգծեց, որ այս պահի դրությամբ խաղաղության գործընթացի մեջ ամենամեծ փոփոխականը Հայաստանի խորհրդարանական ընտրություններ են, եթե ընտրությունները լինեին Ադրբեջանում, ենթադրում է, դա կլիներ փոփոխականը։
«Ադրբեջանական կողմը բավականին կոռեկտ էր իր բոլոր հայտարարությունների, հարցադրումների դիրքորոշումների մեջ, անընդհատ նշում էին, որ ընդունում են՝ Հայաստանի ներքին գործն է, դրա վրա ազդեցություն ունենալու որևէ միջամտություն կամ նկրտում չունեն»,- ասաց Ա. Քոչինյանը։
Հիշեցնենք, որ Հայաստանի և Ադրբեջանի քաղաքացիական հասարակությունների ներկայացուցիչների մասնակցությամբ ապրիլի 10-12-ը Ադրբեջանում տեղի է ունեցել «Խաղաղության կամուրջ» նախաձեռնության շրջանակներում հերթական երկկողմ կլոր սեղանը։
