«Հայկական խորհուրդ» վերլուծական կենտրոնի նախագահ, համակարգող Արեգ Քոչինյանն անդրադարձել է վերջին շրջանում շրջանառվող այն թեզերին, թե հնարավոր է Ադրբեջանից շուրջ 300 հազար ադրբեջանցիների վերաբնակեցում Հայաստանում։
Նա կտրականապես մերժել է նման սցենարի իրատեսականությունը՝ այն գնահատելով որպես քարոզչական խոսույթ։
«Չկա աշխարհի երեսին որևէ հնարավորություն, որ Ադրբեջանը, Թուրքիան, Միացյալ Նահանգները կամ որևէ այլ պետություն կարողանա կազմակերպել, որպեսզի Հայաստանում 300 հազար ադրբեջանցի տեղափոխվի և բնակվի»,– նշել է նա՝ հավելելով,- «Որովհետև մինչև այս պահը իրենք անգամ Ղարաբաղ չեն կարողացել 100 000 մարդ տեղափոխել, որը գտնվում է իրենց վերահսկողության ներքո»։
Նա նաև նշել է, որ նման թեմաների քննարկումը չի համարում լուրջ քաղաքական օրակարգի մաս՝ դրանք որակելով որպես «էժանագին քարոզչամիջոց»։
Անդրադառնալով հարցին, թե արդյոք Բաքվում տեղի ունեցած հանդիպումների ընթացքում քննարկվել են նման պնդումներ, Քոչինյանը պատասխանել է, որ այդ թեման օրակարգում չի եղել՝ հենց դրա անիրատեսական լինելու պատճառով։
Խոսելով Ադրբեջանում որոշ անձանց տրամադրվող «անձնագրերի» մասին, նա ընդգծել է, որ դրանք իրական պետական փաստաթղթեր չեն․ «Դրանք, ըստ էության, հասարակական կազմակերպության կողմից տպված թղթեր են և չեն կարող համարվել անձնագրեր»։
Քոչինյանը նաև կարևորել է երկու հասարակություններում առկա բազմակարծությունը՝ նշելով, որ թե՛ Հայաստանում, թե՛ Ադրբեջանում գոյություն ունեն տարբեր դիրքորոշումներ ունեցող խմբեր։ Նրա խոսքով՝ Հայաստանում հաճախ Ադրբեջանը ընկալվում է որպես միատարր հասարակություն, ինչը չի համապատասխանում իրականությանը։
