«Հայաստան» դաշինքի անդամ Գառնիկ Դանիելյանը գրում է․ «Օրերս անդրադարձել էի Ավինյանի ապօրինի հրահանգին, որով սպառնում էր վարորդներին՝ ուղևորավարձ չպահանջելու դեպքում զրկել արտաժամյա աշխատանքի դիմաց վճարելուց։
Այսօր էլ սույն անձնավորությունը կոչ է անում վարորդներին տրանսպորտը կանգնեցնել և իջեցնել այն ուղևորներին, որոնք կհրաժարվեն վճարելուց։
Սա դեռ բավական չէ, մի բան էլ՝ խորհուրդ է տալիս մեր քաղաքացիներին այսպիսի իրավիճակներում սատարել վարորդին։
Տպավորություն է, որ սրանք ամեն ինչ անում են հանրային տրանսպորտում լարվածություն և բախումներ ստեղծելու, մարդկանց իրար դեմ հանելու համար։
Մեր քաղաքացիներին գետինը մտնելու կոչ է անում և «բեռ» որակում մի քաղաքապետ, որն ամբողջությամբ տապալել է մայրաքաղաքի կառավարումը, այդ թվում՝ տրանսպորտային բարեփոխումներ կոչվածը։
Ուղևորները կանգառներում երկար ժամանակ սպասելուց հետո չեն կարողանում բարձրանալ ավտոբուսներ։ Երբ սրանք նոր էին եկել իշխանության, ցուցադրաբար օգտվում էին հանրային տրանսպորտից։ Առաջարկում եմ իշխանության ներկայացուցիչներին այժմ էլ աշխատանքային ժամի ավարտից հետո օգտվել հանրային տրանսպորտից՝ փորձելով առանց հրելու հասնել վալիդատորին։ Պարզապես անհնար է։
Խայտառակ ցածր վարկանիշ ունեցող քաղաքական թիմ ներկայացնող քաղաքապետին խորհուրդ կտայի, որ առավոտ շուտ մարդկանց վրա «մունաթ» գալու փոխարեն մտահոգվեր, օրինակ, հորդառատ անձրևի հետևանքով անձրևաջրերում արգելափակված մի շարք տրանսպորտային միջոցների հարցով։ Ի Վերջո, միջոցներ ձեռնարկեր հեղեղատարների խնդիրը լուծելու ուղղությամբ, որ ամեն անձրևից հետո քաղաքի փողոցներում չստեղծվեր աղետալի վիճակ։
Այլապես, իրենց իշխանության օրոք ամեն օր երկրում և մայրաքաղաքում ճգնաժամ է։ Անձրև կամ ձյուն է գալիս, ճգնաժամ է, իբրև իրականացնում են ասֆալտապատման աշխատանքներ, քաոս է ստեղծվում փողոցներում։
Ամենուրեք տալիս են շինթույլտվություններ, հատում են ծառերը, չեն փակում աղբավայրերը՝ Երևանի օդի աղտոտվածության մեջ մեղադրելով Արգիշտի թագավորին։
Միայն կարողանում են քանդել, հանձնել, սպառնալ սեփական ժողովրդին, տուգանել ու կալանավորել»։
