Axios-ը գրում է, որ պակիստանցի, եգիպտացի և թուրք միջնորդները առաջիկա օրերին կշարունակեն աշխատանքը Վաշինգտոնի և Թեհրանի հետ՝ փորձելով կամրջել առկա տարաձայնությունները և վերջ դնել պատերազմին։
Չնայած Իսլամաբադում կայացած բանակցությունների լարված ընթացքին, բոլոր կողմերը դեռ հավատում են, որ գործարքը հնարավոր է, և հույս ունեն կազմակերպել բանակցությունների նոր փուլ մինչև ապրիլի 21-ը՝ հրադադարի ժամկետի ավարտը։
Տարածաշրջանային աղբյուրների փոխանցմամբ՝ իրավիճակը փակուղում չէ, և երկու կողմերն էլ պարզապես սակարկում են։ Ամերիկացի պաշտոնյաները նշում են, որ գործարքը կայանալի կլինի, եթե Իրանը ճկունություն դրսևորի և ընդունի Իսլամաբադի առաջարկը որպես լավագույն հնարավոր տարբերակ։
Միևնույն ժամանակ, նախագահ Թրամփը դիտարկում է հարվածների վերսկսման հնարավորությունը, եթե հայտարարված ծովային շրջափակումը չստիպի Իրանին փոխել իր կուրսը։ Սպիտակ տունը շեշտում է, որ շրջափակումը բանակցային գործընթացի մասն է և նպատակ ունի թույլ չտալ Իրանին Հորմուզի նեղուցն օգտագործել որպես լծակ։
Բանակցությունների հիմնական խոչընդոտները կապված են միջուկային խնդրի հետ։ ԱՄՆ-ն պահանջում է, որ Իրանը սառեցնի ուրանի հարստացումը և հրաժարվի բարձր հարստացված ուրանի պաշարներից, մինչդեռ Թեհրանը պահանջում է սառեցված ֆինանսական միջոցների ազատում՝ իր զիջումների դիմաց։ Չնայած Իրանի արտգործնախարար Աբաս Արաղչիի պնդմանը, թե կողմերը գործարքից ընդամենը «մի քանի սանտիմետր» հեռավորության վրա էին, ամերիկյան կողմը դա չի հաստատում, թեև ընդունում է որոշակի առաջընթացի փաստը։
