Այսօր երեկոյան Վաշինգտոնում մեկնարկում են Իսրայելի և Լիբանանի միջև ուղիղ բանակցությունների նախապատրաստական քննարկումները, որոնք անցկացվելու են Միացյալ Նահանգների հովանու ներքո։
Ինչպես հաղորդում են արաբական լրատվամիջոցները, ամերիկյան կողմը հանդիպման ժամը փոփոխել է, որպեսզի պետքարտուղար Մարկո Ռուբիոն անձամբ կարողանա մասնակցել գործընթացին։
Լիբանանյան կողմը հստակ դիրքորոշում է որդեգրել՝ հայտարարելով, որ որևէ հետագա քննարկում հնարավոր չէ առանց կրակի անհապաղ դադարեցման։ Ըստ իսրայելական զլմ-ների՝ Վաշինգտոնը Լիբանանին խոստացել է ճնշում գործադրել վարչապետ Բենիամին Նեթանյահուի վրա՝ հրադադարի պայմաններին համաձայնելու նպատակով։
Հանդիպումը, որին մասնակցելու են երկու երկրների դեսպանները, կենտրոնացած է լինելու բացառապես ռազմական գործողությունների դադարեցման մեխանիզմների վրա։
