Ներկայումս գործում է օտարերկրյա ներդրումների մասին օրենք, որը 1994 թվականին է ընդունվել և չի ապահովում ներդրումային գործընթացի ժամանակակից պահանջներին համարժեք ամբողջական կարգավորում: Ըստ այդմ՝ Կառավարությունը նախագիծ է մշակել՝ փորձ անելով ՀՀ-ում ներդրումների համակարգը բոլորովին նոր մակարդակի բարձրացնել: Այդ մասին նախագիծն առաջին ընթերցմամբ Ազգային ժողովում ներկայացրեց էկոնոմիկայի նախարար Գևորգ Պապոյանը:
Ըստ նախարարի՝ ներդրումների մասին օրենք ՀՀ-ում չկա, և առաջին անգամ է այն ներկայացվում, այդ տեսանկյունից խնդրեց առանձնահատուկ ուշադրություն դարձնել, քանի որ այն բարեփոխումների կարևոր փուլերից մեկն է:
«Նախագծի կարևոր առանձնահատկություններից մեկն այն է, որ սահմանված կարգավորումները տարածվելու են ոչ միայն օտարերկրյա, այլև տեղացի ներդրողների ու ներդրումների վրա, մինչդեռ արդեն իսկ պարզ է, որ ներկայումս գործող օտարերկրյա ներդրումների մասին օրենքը տարածվում է միայն օտարերկրյա ներդրումների և ներդրողների վրա, և չի կարգավորում տեղացի ներդրողների հետ կապված հարաբերությունները»,- ասաց նա:
Ըստ նախարարի՝ նախագիծը սահմանում է ՀՀ-ում ներդրումների իրավական հիմքերը, ներդրողների և նրանց ներդրումների նկատմամբ կիրառվող ազատությունները, երաշխիքները և ներդրողների իրավունքներն ու այդ իրավունքների պաշտպանության կառուցակարգերը, ներդրողների պարտականությունները, ներդրումային խթանների իրավական հիմքերը, տրամադրման սկզբունքներն ու վարչարարությունը, ՀՀ-ում ներդրումային քաղաքականության ինստիտուցիոնալ շրջանակը:
«Նախագիծը բացառում է խտրականության երաշխիքը երկու հայտնի բաղադրիչներով՝ ազգային ռեժիմ, ըստ որի՝ օտարերկրյա ներդրողներն ունեն տեղացի ներդրողներին հավասար իրավունքներ, ազատություններ և պարտականություններ, և առավել բարենպաստության ռեժիմը, ըստ որի՝ ՀՀ-ում բոլոր օտարերկրյա ներդրողները համանման հանգամանքներում ունեն հավասար իրավունքներ, այսինքն՝ օտարերկրյա ներդրողն իրավունք ունի ակնկալել ՀՀ-ից այն նույն բարենպաստ վերաբերմունքը, որը ՀՀ-ում կիրառվում է որևէ այլ օտարերկրյա ներդրողի նկատմամբ»,- ասաց նա՝ հավելելով, որ բացառությունը նախատեսված է միայն միջազգային պայմանագրերի հիման վրա ստեղծված Մաքսային միության, ԱՏԳ-ի, Տնտեսական միության, միասնական շուկայի, հարկային ռեժիմի կարգավորումների և միջազգային այլ պայմանագրերի մասով:
