«Ամբողջ մեղադրանքը կառուցված է ինչ-որ մարդկանց ցնորքների հիման վրա»,- Արմավիրի մարզի ընդհանուր իրավասության դատարանում ընթացող դատական նիստում հայտարարեց Արշակ արքեպիսկոպոս Խաչատրյանը։
Նա միացավ իր պաշտպանների միջնորդությանը՝ հենց այս պահին դադարեցվի քրեական հետապնդումը։
Սրբազանը նշեց. «Ստացվում է մի իրավիճակ, երբ չկա հանցագործության իրեղեն ապացույցը, չկա տուժող, բայց կա պատվիրատու։ Անցած անգամ տեղեկացանք, որ թմրանյութն էլ կորել է, չկա մարդը, որ ստացել է այդ թմրանյութը, չկա մարդը, որ տեղադրել է, բայց, չգիտես ինչու, հրապարակի վրա հայտնվել եմ ես։
Ես քաղաքական գործունեությամբ չեմ զբաղվել, բայց մաքուր քաղաքական հետապնդման բաղադրիչներով, էլեմենտներով կառուցված գործ է, և այլ բան, քան քրեական գործի անմիջական վերացում, ես չեմ ակնկալում։
Ակնհայտ է՝ որ այստեղ ամեն ինչ կեղծ է և շինծու։
Եթե դատարանները մինչև այս պահը գտնվեին իերնց բարձրության վրա, դատախազությունը բավարար անաչառ գտնվեր, պատվիրակված չլիներ, մենք այս վիճակը չէինք ունենա։ Հետևաբար ես ուրիշ պահանջ չունեմ»։
Դատախազը միջնորդեց, որ Արշակ Սրբազանի նկատմամբ քրեական հետապնդումը չդադարեցվի։
Դատավոր Արթուր Ադամյանը մերժեց պաշտպանների միջնորդությունը։
Հիշեցնենք, որ Արշակ Սրբազանին մեղադրանք է ներկայացվել այն բանի համար, որ նա 2018 թվականին «Նոր Հայաստան, նոր հայրապետ» շարժման անդամներին վարկաբեկելու նպատակով անհայտ անձին հանձնարարել է ակցիայի մասնակիցներ ուսապայուսակի մեջ մարիխուանա գցել, իբր թե այդպիսով Սրբազանը կատարել է իրացման նպատակով թմրամիջոցի շրջանառություն։ Այդ թմրամիջոց իրեղեն ապացույցն անհետացել է քննչական մարմնից։ Այս գործով Սրբազանին 3 ամիս կալանավորված է եղել։
