ԱԺ «Հայաստան» խմբակցության պատգամավոր Արմեն Ռուստամյանն անդրադարձել է առաջիկա ընտրություններում «Հայաստան» դաշինքի ընտրացուցակում իր չընդգրկվելուն։
Ռուստամյանի խոսքով՝ ինքը ՀՅԴ Բյուրոյի ներկայացուցիչն է, և աշխատանքային գերծանրաբեռնվածությունը դժվարացնում է կուսակցական ու պատգամավորական գործունեության համատեղումը։ «Եվ հետո, մեր կուսակցությունը հո սովորական կուսակցություն չէ՞, համաշխարհային կառույց ունենք՝ ավելի քան 30 երկրներում ներկայությամբ։ Իսկ Բյուրոյի ներկայացուցիչն այդ բոլոր կառույցների ղեկավարումը պետք է համակարգի»,- ասել է նա։
Ինչ վերաբերում է առաջիկա ընտրություններին, պատգամավորը նշել է. «Եթե այս իշխանություններն իսկապես հաջողեն, մենք կունենանք ոչ թե խորհրդարանական ընտրությունների արդյունքում ձևավորված ԱԺ, այլ՝ «Միլլի մեջլիս»։ Եվ այդ «Միլլի մեջլիսում», եթե այդպես լինի, թող որոշեն՝ աշխատելն իմաստ ունի՞, թե՞ ոչ»։
Նա նաև հավելել է, որ հոգնել է խորհրդարանի ներկայիս մթնոլորտից. «Այս փողոցային հարաբերությունները, այս խուլիգանական վակխանալիան ոչ մեկի համար հաճելի չեն։ Իրեն հարգող մարդն իսկապես այստեղ անելիք չունի»,- ասել է նա։
